Las votantas ed ils votants da Falera han dà glisch verda per sviluppar il loschament «La Mutta». Il suveran approvescha unanimamain, che la vischnanca cumpra terren per 1’171’000 francs. Quai vul dir ch’ella cumpra il terren necessari e ceda quel en il dretg da construcziun ad ina societad da svilup. La societad, numnada «La Mutta SA», vegn a consister or da la vischnanca da Falera, l'Arena Alva e la firma da cussegliaziun Blauhut AG.
La radunanza ha er approvà unanimamain che la vischnanca possia sa participar cun 102’000 francs a quella societad d'aczias. La Mutta SA vegn uschia fundada l'entschatta december. Ed a partir da 2023 po vegnir planisà in edifizi che tschiffa enfin 150 abitaziuns administradas.
La Mutta SA vegn fundada entschatta december
Per preschentar detagls èsi anc memia baud. L’entschatta da december vegn la societad d’aczias fundada. Suenter la fundaziun da «La Mutta SA» sto il preproject vegnir elavurà. Parallel tar quai vegn la planisaziun da l'areal lantschada. Cler è er ch’il architect da renum, Gion Antoni Caminada, è vinavant da la partida. Segir è er che las abitaziuns vegnan vendidas. Ellas duessan vegnir nizzegiadas turisticamain, analog al «Rock Resort» a Laax. Tenor ils responsabels è la ristga finanziala per la vischnanca da Falera pitschna. La gronda cumpart dal chapital da ristga surpiglia l'Arena Alva cun 6 milliuns da 9,1 milliuns francs.
Il resort la Mutta è l’emprima etappa da plirs projects che duain suandar. Vinavant duess in parcadi sutterran vegnir realisà, ina nova pendiculara en il territori da l’Arena Alva ed ina colliaziun tranter il resort e la staziun sut da la pendiculara. Sche quai duess alura esser ina metro, na po anc nagin dir.
