La pandemia e sias restricziuns avevan laschà rumper en ils viadis tar quellas occurrenzas publicas cun sias fullas, ma il turissem a las fieras da Nadal ha puspè prendì chatsch. Mintga december charreschan plirs bus da la Surselva en Germania.
Quellas fieras da Nadal èn anc tschertgadas, principalmain tar las dunnas. Ma jau hai er umens che vegnan cun.
Armin Bundi è impressari d'auto da posta ed organisescha mintga onn da quels viadis. Quest onn haja el pudì organisar in viadi supplementar a Constanza, tar quels dus ch'el aveva gia planisà. Surtut dunnas fetschian diever da quella purschida, uschia Armin Bundi.
Fascinaziun: fieras da Nadal
Las fieras tudestgas attiran plirs milliuns visitadras e visitaders ad onn. Sulet la fiera da Constanza cun ses 170 stans e budas quinta mintg'onn var in mez milliun visitaders. Ella è populara pervia da sia vischinanza tar il port ed il lai.
Ils stans preschentan da tuttas sorts raubas: schlingias ord stoffa cun muster da l'orient, pullovers ed autra vestgadira ord launa d'alpaca, soccas da tut las colurs e musters da Nadal, stailas e culas da Nadal.
Ina giada prender in di liber, betg guardar sin l'ura.
Schebain che las visitadras ed ils visitaders cumpran ina duas chaussas tar las fieras da Nadal en Germania, i na giaja betg per turissem da cumpra. L'eveniment quinta: far insatge da cuminanza, giudair in bel temp, entupar autra glieud, baiver in vin chaud e baterlar e mangiar ina buna buccada, saja quai in «striezel» u mandlas brassadas.
Nus giain tranter collegas ina giada ad onn ad ina fiera da Nadal.
Quai è tradiziun.
Or da l'archiv:
