Siglir tar il cuntegn

Header

cuntegn

Flem Access al Lag la Cauma pudess vegnir limità

D'Anzainzas e da Tschuncaisma ha Flem gì traffic sco uschiglio sulet ils pli intensivs dis da la stagiun d'enviern. Problems haja era dà cun bler rument per la cuntrada e grilladas en lieus betg lubids.

Flem quinta da stuair limitar las proximas emnas l'access al Lag la Cauma che avra ils 6 da zercladur sias portas. Cura ch'il dumber da visitaders surpassass 2'000 persunas, fissian els pronts da reagir, scriva la vischnanca da Flem. Excepziuns èn previsas per indigens, giasts d'otels e possessurs d'abitaziuns secundaras.

Rument surchargià e fieus betg lubids

Er ils ruments publics èn stads surchargiads durant quests dis, er cun las tualettas publicas saja stà il medem. Bler rument è er vegnì laschà en la natira. Perquai vegnian ins a far ils proxims dis ina schubregiada tras il guaud grond ed enturn il Lag la Cauma. Plinavant vegnia a dar en avegnir dapli turas per svidar ils ruments.

Problems hai era dà cun grilladas betg lubidas, ordaifer las fuainas publicas. Ils pumpiers da Flem e la polizia han stuì vegnir en acziun pliras giadas.

Nov concept da traffic

Da Tschuncaisma ha la polizia da la vischnanca realisà il nov concept da traffic. Ils excursiunists dad in di hajan ins fatg parcar sche pussaivel en la chasa da parcar Stenna. Quai ha gì sco finamira ch'il traffic da glieud ch'è a la tschertga vegnia diminuì. Quest concept vegn discutà e meglierà.

Insumma vul la vischnanca durant questa stad adina puspè giuditgar da nov la situaziun e lura adattar las mesiras mintgamai a la situaziun.

audio
Per tadlar: Las novitads da las 18:00
ord Novitads dals 05.06.2020. Maletg: RTR
laschar ir. Durada: 6 minutas 25 Secundas.

RTR novitads 17:00

Artitgels legids il pli savens