La suprastanza communala ch'è en uffizi dapi l'entschatta da l'onn ha preschentà ils projects gronds e las participantas ed ils participants lur giavischs e quitads.
Avant che finir il program da l'avantmezdi ha il moderatur Gieri Spescha supplitgà la suprastanza communala da formular in giavisch persunal. Las tschintg opiniuns e respostas pon esser represchentativas per tuttas participantas e tuts participants da la dieta:
«Era en il futur vi jau sentir che Flem è mia patria», ha il president communal formulà sia resposta. Ses quatter cunsuprastants han respundì «Flem duai restar Flem», «Jau giavischass dapli spazi d'abitar pajabel», «Ina participaziun pli activa a la politica», «Che dapli glieud giuvna vegniss activa».
La terza giada suenter 2022 e 2023 ha la suprastanza communala da Flem organisà ina tala occurrenza. A quella ha la suprastanza envidà indigens ed abitants secundars. Bunamain 300 persunas eran s'annunziadas, da quai 80% glieud indigena. «Quella relaziun è tant pli remartgabla damai che nus avain qua a Flem ina quota da 70% abitaziuns secundaras e mo 30% primaras», ha Christoph Schmidt ditg en ses bainvegni.
Mintga vischnanca ha sias sfidas
La dieta precedenta avant dus onns era focussada sin il spazi d'abitar, ma questa giada ha la suprastanza vulì preschentar il stan dals projects gronds e da la lavur per la legislatura 2025-2028. Il focus principal è stà il dialog e la communicaziun tranter ils participants.
In referat da Reto Lindegger, l'anteriur directur da l'Associaziun svizra da vischnancas, ha dà impuls a la discussiun. El ha menziunà che la Svizra ha anc adina passa 2'000 vischnancas suveranas e che mintgina è confruntada cun diversas sfidas modernas sco infrastructura, demografia, chargias socialas, indifferenza, mancanza da participaziun e digitalisaziun.
«Flem è dentant lunsch davent d'ina catastrofa», ha il referent quietà l'auditori.
Chattar investurs per la parcella Burckhardt
La legislatura 2025-2028 è caracterisada da projects impurtants, cun in focus principal sin il spazi d'abitar per indigens. Flem dovra radund 171 abitaziuns ils proxims onns. Il president communal ha fatg attent a las numerusas activitads da construcziun en la vischnanca.
Per crear spazi d'abitar per indigens, ha la vischnanca cumprà la parcella Burckhardt, in prà da passa 3'500 m2 en ina posiziun ideala a Flem Vitg. Igl è previs d'organisar ina concurrenza d'architectura quest atun.
Laurène Gartmann, manadra dal departament social, ha accentuà che la vischnanca examinescha diversas opziuns per realisar quest project, inclusiv models da cooperativa, cooperaziuns cun fundaziuns d'utilitad publica e cassas da pensiun. Ella ha era menziunà l'idea d'in nov center da sanadad per la vischnanca.
Er èn vegnids preschentads ils projects principals center da sport Prau la Selva, Arena tectonica Sardona e la pendiculara da latg Fidaz. Tranter auter ha la suprastanza infurmà d'in nov edifizi da recicladi a Punt la Reisga.