Il project da piunier Flemxpress da la firma Bartholet e da l'Arena Alva è dapi il december 2023 en funcziun, ma anc adina en svilup. La pendiculara innovativa porscha als osps in viadi sin dumonda. Cun il buttun pon ins giavischar nua ch’il viadi duai ir. Il sistem innovativ ha dentant era chaschunà colonnas dad osps surdumandads l’enviern e pliras interrupziuns dal manaschi questa stad.
Manuel Schwarz, il manader da las pendicularas da l’Arena Alva, declera che retardaments pli lungs èn resultads da pitschens sbagls che han chaschunà reacziuns tar il sistem da controlla. Quests problems hajan ins curregì cun adattaziuns dal program.
La pendiculara ha ina gronda prestaziun, ma ella n’è anc betg sviluppada a fin.
Il Flemxpress saja in concept cumplettamain nov che cumpiglia cumponentas mecanicas ed electronicas sviluppadas aposta per la pendiculara. Manuel Schwarz accentuescha che l’indriz da cumond vegnia anc adattà per automatisar dapli proceduras ed uschia augmentar l'effizienza. Da princip haja la pendiculara ina gronda prestaziun ma quella sa reduceschia perquai che l'indriz n'è anc betg sviluppà a fin. Atgnamain duess il manaschi da la pendiculara funcziunar cun pli pauc persunal, ma l’Arena Alva n’è anc betg là nua ch’ella vul esser, uschia il manader da las pendicularas.
In'autra sfida saja da nettegiar las gondolas. Cunquai ch’il Flemxpress vegn utilisà da ciclists da muntogna cun ils velos en las gondlas, vegnian quellas tschuffas, quai per il displaschair da las viandantas e viandants. Actualmain vegnia nettegià en mintga minuta libra, di Manuel Schwarz. In team da nettegiada saja vi d'elavurar la meglra e pli svelta metoda, registrond ils intervals necessaris per l’avegnir.
Uss è stad, ma l’Arena Alva anticipescha per il proxim enviern. L'intent è da garantir in manaschi senza interrupziuns chaschunadas d'errurs e cun la pli gronda prestaziun pussaivla. Il Flemxpress duai funcziunar a moda e maniera ecologica ed economica. Las finamiras na sajan anc betg cuntanschidas, ma l’Arena Alva quinta da prender en mira ils respargns en ils proxims onns, uschia Manuel Schwarz.
Il Flemxpress tutga tar las charas pendicularas en Svizra
Esser da viadi cun il Flemxpress ha ses pretsch: Ina persuna che cumpra ussa in bigliet d'ir cun la pendiculara da Flem si Segnes ed engiu, paja 90 francs (stan: 8 da fanadur 2025). Quai è il pretsch senza abunament da mesa taxa. Sch'ina famiglia da quatter persunas giess tar quellas cundiziuns si Segnes, pajass ella 270 francs per quest viadi.
L'Arena Alva giustifitgescha quests pretschs cun la protecziun da l'ambient. Quella cuntrada natirala unica e digna da protecziun, pretendia in diever responsabel pertutgant il dumber da visitaders. Il pretsch serva perquai era sco instrument da regulaziun per evitar il turissem da massa e per conservar l’ambient sensibel sin il Plaun da Segnes.
L’Arena Alva saja conscienta ch’il pretsch singul per in viadi simpel possia parair aut per ina famiglia da quatter persunas. Las differentas categorias da bigliets e las purschidas lubeschian dentant era a famiglias e persunas cun pli pauc daners da duvrar la pendiculara. Surtut cun la mesa taxa sa sminuescha il pretsch considerablamain. Per osps da divers hotels sajan ils pretschs inclus.
Il pretsch serva era sco instrument da regulaziun per evitar il turissem da massa e per conservar l’ambient sensibel sin il Plaun da Segnes.
Davart il svilup dals pretschs na dettia tenor l’Arena Alva anc naginas tendenzas cleras a lunga vista, enfin ussa na saja betg l’entira pendiculara en funcziun ed ils novs tschancuns sajan vegnids pass per pass vitiers.
Er sch’il svilup dals pretschs n’è betg previsibel, san ins dentant dir ch’il Flemxpress tutga tar las charas pendicularas en Svizra. Quai cun esser en il medem segment da pretsch sco la viafier dal Rigi u las pendicularas da Zermatt.
Ord da l'archiv: