Siglir tar il cuntegn

Header

video
Novas cabinas intelligentas a Flem
Or da Telesguard dals 23.11.2023.
laschar ir. Durada: 4 minutas 41 Secundas.
cuntegn

FlemXpress Ultims tests per novas cabinas intelligentas a Flem

L'Arena Alva e la vischnanca da Flem han bajegià la nova pendiculara da Flem enfin Cassons e Nagens Sura. Las lavurs da construcziun da las emprimas etappas èn finidas ed il mument vegnan fatgs ils ultims tests per avrir ina part ils 16 da december.

Sin la stagiun d'enviern duessan las emprimas duas etappas dal Flemexpress esser en funcziun, tge che munta che las skiunzas ed ils skiunz pon ir cun las novas gondlas da 10 persunas da Flem enfin Startgels. La pendiculara sa basa sin ina nova tecnologia. Ils osps pon clamar la gondla cun smatgar sin in buttun ed uschia inditgar nua ch'els vulan ir. Quest nov sistem da «ropetaxi» custa radund 85 milliuns francs, las hallas da las staziuns mez e sura ston esser pli grondas, per che las gondlas sajan semtgadas cura che l'osp smatga il buttun. L'investiziun haja tenor il mainafatschenta da l'Arena Alva, Markus Wolf, plirs avantatgs per la gestiunari.

L'innovaziun è che nus mettain mo ina gondla vi da la suga, cura ch'insatge sesa lien.
Autur: Markus Wolf mainafatschenta da l'Arena Alva
audio
FlemXpress: Vi da far tests
ord Actualitad dals 23.11.2023. Maletg: RTR
laschar ir. Durada: 3 minutas 40 Secundas.

Uschia po ina persuna manischar l'entir sistem, tge che spargna persunal. E cunquai che las gondlas van mo sin dumonda, spargna la gestiunaria energia. Ensemen cun ina firma spezialisada ha l'Arena Alva lantschà il taxi da suga e la proxima stagiun d'enviern po ella per l'emprima giada testar il sistem en ses manaschi.

Sura cun retard, sut persuenter pli spert che planisà

Tenor l'inschigner e mainaproject, Claudio Casutt, hajan las lavurs tar las staziuns sura a Segnas e Nagens cumenzà cun retard, cunquai che l'aura è stada schletta la primavaira. Ma en ils tschancuns sut sajan ins stads uschè spert sco anc mai. Bainprest, a partir da mez avust, possian ins montar la suga da Flem enfin Foppa. Las construcziuns da betun èn quasi a fin tar las staziuns da Foppa e tar la staziun sut a Flem. Las armaturas da fier spetgan sin la suga.

Uschè baud essan nus anc mai stads cun ina pendiculara, uschia avain nus anc trais mais temps per tschellas lavurs.
Autur: Claudio Casutt inschigner e mainaproject
audio
La suga dal FlemXpress vegn bainprest montada
ord Actualitad dals 08.08.2023. Maletg: RTR
laschar ir. Durada: 3 minutas 48 Secundas.

Ina da las grondas sfida dals planisaders è stada, da construir in indriz che na croda betg ora memia fitg en la cuntrada. Las staziuns èn bajegiadas viaden en il terren, tge che mundia in stgavament pli profund ed entras quai, dapli custs. La staziun da Segnas, là nua ch'il Flemexpress vegn en il futur u ir en la direcziun da Nagens Sura u si Cassons, è fitg cumplexa cun sia structura sutterrana. Plinavant producescha la fatschenta da construcziun il betun sin il plazzal, uschia ch'ella dovra la crappa ch'è avant maun e manizzar quella là. La laina per las staziuns vegnan or dal guaud da Flem e Trin.

Sin la fin dal proxim onn pia la stad 2025 duai l'entir indriz da Flem enfin Cassons e Nagens Sura esser bajegiads ed en funcziun.

RTR actualitad 17:00

Artitgels legids il pli savens