Siglir tar il cuntegn

Header

cuntegn

Flem Mintg'onn vegnan 22 abitaziuns midadas tar abitaziuns secundaras

A Flem èn gia radund 7 da 10 abitaziuns abitaziuns secundaras. Cun la vendita d'abitaziuns primaras pudess quella cumpart anc crescher.

In studi da la Scol'auta dal Grischun demussa che bleras abitaziuns primaras a Flem vegnan midadas tar abitaziuns secundaras. Ils possessurs u las possesuras pon far gudogn cun vender ellas sco abitaziuns secundaras.

Tut en tut èn durant tschintg onns 112 abitaziuns vegnidas midadas tar abitaziuns secundaras. L'incumbensa per il studi ha il chantun dà. Flem ha numnadamain ina da las pli autas quotas da segundas abitaziuns da la Svizra.

La lescha davart abitaziuns secundaras

Avrir la box Serrar la box

La lescha federala scumonda da bajegiar abitaziuns secundaras en vischnancas ch'han dapli che 20% abitaziuns secundaras. Ella na restrenscha betg la midada d'abitaziuns ch'èn gia bajegiadas tar abitaziuns secundaras.

En l'entira Svizra pudess il dumber d'uschènumnadas «conversiuns quietas» muntar a circa 32'000 abitaziuns. Cunquai che la gronda part da quellas midadas capita a dascus mancan però las cifras concretas.

Abitaziun secundara
Legenda: Abitaziuns secundaras èn cunzunt duvradas durant la stagiun turistica, uschiglio èn ellas vidas. Sin il maletg ina abitaziun secundara a Flem. Keystone

Ils auturs e las auturas dal studi renvieschan sin in problem: A Flem èn il 2022 mo 7 abitaziuns primaras stadas libras, da total 5'200 abitaziuns en la vischnanca. La midada d'abitaziuns primaras en abitaziuns secundaras agraveschia quella mancanza.

Er sche bleras abitaziuns vegnan midadas tar abitaziuns secundaras: ina part vegn vinavant dada en locaziun sco abitaziuns primaras, per pretschs pli auts. En il studi scrivan las auturas che indigens ed indigenas possian a lunga vista betg esser ablas da pajar quai. Uschia sa pegiureschia medemamain la mancanza da spazi d'abitar liber.

Flem vul dar cuntrapaisa

Ch'i dettia ina mancanza da spazi d'abitar pajabel per famiglias indigenas e persunas singulas è er enconuschent en la vischnanca da Flem. Sco il president communal da Flem Martin Hug ha ditg envers la gasetta Südostschweiz, manchian medemamain abitaziuns per il persunal da purschiders turistics. «La mancanza da forzas spezialisadas en cumbinaziun cun la mancanza d'abitaziuns è tissi per mantegnair ils servetschs e las purschidas.»

Uschia dettia plirs projects ch'èn en planisaziun. Tranter auter duai dar 22 fin 25 abitaziuns per indigens a Flem Casa d'Uaul, quai fa dentant neccessari in'adattaziun dal plan da zonas. Vinavant duain vegnir realisads sut la punt Stenna abitaziuns da persunal e studios. Sulet a Flem manchian passa 100 da talas abitaziuns, sco Hug ha ditg vinavant. Ulteriuras abitaziuns ed ils plans correspundents vegnian ins a preschentar a la populaziun.

RTR novitads 12:00

Artitgels legids il pli savens

Scrollar a sanestra Scrollar a dretga