«Freipass» - Il Lucmagn en ils mauns dals velos

Quest onn vegnan quatter pass grischuns averts durant quatter uras per il traffic plaun. L’entschatta ha fatg il pass dal Lucmagn: L’aura ha constà e radund 300 velocipedists e velocipedistas èn stads annunziads, sco ils organisaturs han confermà. Ma grazia a la bell'aura sajan la finala probabel passa 500 participants e participantas stads da la partida. Dumbrà ils participants e las participantas n'hajan ils organisaturs dentant betg, conferma la directura da Sedrun-Mustér Turissem, Nicole Weber.

Incaps n’haja dà quasi nagins – sulet ina famiglia haja vulì traversar il pass per ascender sin lur chamona durant l'occurenza. La finala ha la famiglia dentant mussà chapientscha ch'igl è da spetgar, ha ditg Nicole Weber.

Era l’auter onn puspè

La purschida è vegnida schazegiada, perquai vulan las organisaziuns turisticas d'omaduas varts dal pass Lucmagn era l'auter onn puspè repeter l’occurrenza – quai sche tut las lubientschas èn puspè avant maun, manegia Nicole Weber.

Era da las velocipedistas e dals velocipedists hai dà buns resuns. Tenor lez e lezzas pudess ina tala occurrenza vegnir repetida pli savens. Nagin haja gì d’avair tema dal traffic, ins haja pudì giudair la natira ed il ruaus e la finala dar ina baterlada cun autras amaturas ed amaturs da l’ir cun velo.

Las proximas occurrenzas dal «Freipass»

Avrir la box Serrar la box

Pass dal Spleia – 29-06-2025

Pass Umbrail – 30-08-2025

Pass da l'Alvra – 07-09-2025