Da la retschertga è resultà ch'i fiss stà pussaivel da sa cunvegnir en differents puncts dispitaivels. Dentant è er resultà or da la dumonda, tge tenuta che la populaziun haja da princip envers ina fusiun, ch'ina tala na vegniss actualmain betg sustegnida en ina votaziun dal pievel. Quai scrivan las duas suprastanzas communalas en ina communicaziun a las medias.
Pront per cumpromiss...
En toal èn 679 persunas sa participadas a la consultaziun. A Sumvitg ha la participaziun muntà a 39,5% da la populaziun, a Trun 33,6%. En l'evaluaziun saja sa mussà ch'i fiss bain stà pussaivel da chattar in cumpromiss en las dumondas da la vopna, dal num sco er da l'organisaziun politica per ulteriuras tractativas.
... ma betg per fusiun
La dumonda da l'opiniun generala davart ina fusiun da las vischnancas, hai dentant guardà or auter. 56% da las votantas e das votants da Trun fissan stads pronts da fusiunar ed han respundì cun «plitost positiv» e «fitg positiv». A Sumvitg èsi stà il cuntrari. Là han 56% dà ina resposta negativa, pia ubain cun «plitost negativ» u cun «fitg negativ». Sin fundament d'ina analisa pli detagliada dal resultat ed er dals commentaris sin la dumonda, hajan ins concludì che las persunas ch'èn cunter ina tala fusiun, na vegnian cun fitg gronda probabilitad betg a midar lur opiniun. Quai er betg sch'ins adattass tschertas chaussas anc pussaivlas vi dal project da fusiun.
Collavuraziun duai cuntinuar
Pervi da quests resultats èn las duas suprastanzas sa decididas da sistir il project da fusiun. Trun e Sumvitg vegnian a cuntinuar cun lur stretga collavuraziun en las spartas da la scola populara, ils pumpiers, il provediment d'aua, la purificaziun da las auas tschuffas e l'allianza da taglia. Or da l'evaluaziun saja er resultà che la populaziun è da principi positiva envers ina collavuraziun entaifer l'uffizi forestal ed il manaschi tecnic. Sch'il project per in bajetg communabel per l'uffizi forestal ed il manaschi tecnic, sco er per ils pumpiers vegn cuntinuà, vegn decidì suenter ulteriurs scleriments.
Perder il num na vul nagin
Per la gronda part da la populaziun dumandada sin via a Trun e Rabius è la fusiun betg madira. Uschia è surtut la tema da perder anc dapli che fin qua da sentir.
A Rabius avain nus pers la posta, la banca, la stizun e bleras pitschnas interpresas, daco anc dar si dapli per ina fusiun.
Nagin vul perder il num, quai è chapaivel. Ma per tut avessan ins chattà ina soluziun, era per il num.
Dentant cuntenta la collavuraziun actuala la gronda part da la populaziun.
La situaziun actuala cun avair communabel scola, pumpiers, serenera ed ina allianza da taglia, cuntenta gia, uschia ch’ina fusiun na fa betg basegn.
