Il Departament federal d’ambient na vul betg laschar renovar ed engrondir la chamona da Maighels da la secziun Piz Terri dal Club alpin svizzer. La chamona sa chattia en ina regiun cun palids protegidas ed uschia na possian ins betg dar la lubientscha da construcziun.
Intschert co agir
Per tut ils pertutgads saja la decisiun stada ina surpraisa, ha ditg il president da la secziun Piz Terri Arno Arpagaus. Quai surtut perquai che la sanaziun da la via n’era betg stada in problem e las lubientschas eran vegnidas dadas, schegea che quella sanaziun haja era tangà palids protegidas, di il president.
Project dovra uss squitsch politic
Per la secziun restian uss trais opziuns. Ina saja da stgarpar giu la chamona existenta ed eriger ella ordaifer il perimeter da palids protegidas. Ina segunda opziun saja da vegnir tar ina lubientscha speziala tras il Cussegl federal e la terza saja d’empruvar da persvader il departament federal. Quai surtut perquai ch'en auters chantuns saja stà pussaivel da realisar ed engrondir chamonas era en lieus cun palids protegidas. Ma i saja deplorablamain da supponer ch’il departament veglia stgaffir in cas da precedenza e quai na possia betg esser en l’interess dal svilup persistent.
Project n’è anc betg mort
Mort na saja il project anc betg era perquai che la secziun haja gia approvà il credit da 2,4 milliuns francs per la sanaziun ed engrondiment ma el vegnia a stuair surmuntar anc bain inqual obstachel, ha ditg Arno Arpagaus.
RTR novitads 06:00
