Avant 30 onns è la cuminanza rumantscha vegnida fundada per cumbatter la derasaziun dal tudestg en vischnanca. L'uniun è s'engaschada per l'instrucziun rumantscha en scola, per la tgira da nums rumantschs da vias e per servertschs divins da la dumengia per rumantsch. Quai che saja sa mussà ils ultims trais decennis, saja ch'ils Rumantschs e las Rumantschas tegnian ensemen, di Marcel Camenisch, il president da l'uniun.
Sch'i va per ina chaussa, lura ans pudain nus organisar sezs e chattar glieud en nossas atgnas retschas, che ans sustegnan.
Er per la festa han els chattà in promi rumantsch – Mattiu Defuns chanta e suna la saira suenter in apero.
Tenor il president datti quest onn bler da festivar. D'ina vart ch'i dat l'uniun gia uschè ditg, e da l'autra vart ch'ella è cun ses passa 100 commembers e commembras anc adina uschè activa. Ina da questas activitads èn ils cafés rumantschs, declera el. 10 giadas ad onn s'inscuntra l'uniun e discurra, baiva café, baratta u taidla in referat.
Cun questas sentupadas vivain nus vinavant nossa cultura.
Ultra da las persunas che emprendan rumantsch, giavischa l'uniun anc insatge auter – glieud giuvna! «In barat tranter giuven e vegl fiss mo da beneventar», uschia Marcel Camenisch. La lingua possian ins era laschar viver en il pitschen – in «bien gi» empè d'in «grüezi» possia gia far ora bler.