Siglir tar il cuntegn

Header

cuntegn

Surselva Glion: 8 milliuns per fermada d'autos da posta

Il parlament ha approvà il credit d'obligaziun per mauns da l'urna.

La fermada d’autos da posta a Glion è in project d’impurtanza regiunala. Gist pervia da quai ha il Cussegl grond concedì ina summa da 4 milliuns francs per il project regiunal. Quella summa è dentant anc suttamessa al referendum facultativ.

audio
Mezdi: 8 milliuns per fermada d'autos da posta a Glion
ord Actualitad dals 21.06.2018.
laschar ir. Durada: 2 minutas 30 Secundas.

Per la vischnanca da Glion restan anc var 2,5 fin 3 milliuns francs da pajar vi dal project. Plinavant quinta la vischnanca che custs da fin 1,5 milliuns francs vegnan cuverts da contribuziuns da perimeter e finanziaziuns extraordinarias da la viafier per detagls dal project.

Obligaziun da metter a disposiziun fermadas da bus

La lescha da traffic public pretenda, che la vischnanca mettia a disposiziun fermadas d'auto da posta. A Glion vegn anc vidlonder che la lescha davart l’egualitad da persunas cun impediments pretenda d'adattar la fermada als basegns da persunas cun impediments. Per Glion sco center da la Surselva cun ospital, chasa da vegls ed Argo è quai indispensabel. Plinavant è Glion la segund gronda staziun d'autos da posta dal Grischun.

Atgnamain vegn discurrì a Glion gia dapi blers onns sur da quella midada. Entras la realisaziun da la surbajegiada Marcau e la renovaziun da la staziun da viafier è il temp arrivà che la vischnanca sto investir. Il credit d’obligaziun dad 8 milliuns è vegnì approvà dal parlament e vegn ils 23 da settember a l'urna. La vischnanca vegn anc ad orientar la populaziun. I saja d’evitar che la populaziun refusia il project, è sta d’udir en il parlament.

RR actualitad 11:00

Artitgels legids il pli savens