Planisada era l’avertura da la pratica da veterinaris Capricorn per il 1. da favrer. Tanschia n’hai betg dal tut. La pratica è averta il mument mo cun in servetsch da basa. Sco dapertut ha il coronavirus gì in’influenza sin il plan da termins da la nova pratica da veterinaris.
Labor è in element impurtant
Per pudair reagir pli spert en cas d’urgenza ha la pratica da veterinaris drizzà en in labor cun la pli nova tecnologia ch’i dat el mument. Cunzunt la notg e las fins d’emna èsi per il veterinari Fadri Vincenz impurtant da pudair far sez las analisas dal sang. Sch’i fiss da trametter il sang en in labor spezialisà, cuzzass quai dus dis enfin ch’il resultat fiss avant maun. In temp ch’ils veterinaris e las veterinarias n’han betg adina.
La lavur en il labor vegn fatga dals veterinaris e da las veterinarias ubain da las assistentas da la pratica d’animals. Cun installar in labor en la pratica vul Fadri Vincenz mantegnair – u en il meglier cas schizunt stgaffir – plazzas da lavur en la regiun.