Legenda:
Er quest onn na datti nagin Städtlifest a Glion. Il 2022 vulan ins puspè realisar la festa.
RTR, Linus Livers
cuntegn
Glion - Städtlifest n'ha betg lieu quest onn
La festa da la citad da Glion, il tradiziunal Städtlifest, na po betg vegnir organisada quest onn. Quai ha il comité d'organisaziun communitgà, suenter ch'il Cussegl federal ha dà enconuschent las davosas decisiuns en connex cun las schluccadas da las mesiras da corona.
Occurrenzas cun fin a 10'000 persunas èn pussaivlas pir davent dals 20 d'avust. Per il Städtlifest saja quai memia tard. Quel è fixà normalmain sin l'emprima emna suenter il prim d'avust.
Il comité d'organisaziun examinescha dentant da far ina pitschna festa durant il settember. Quella na fiss dentant betg en il rom da la festa da la citad tradiziunala. Il proxim Städtlifest per propi è uss fixà sin l'entschatta avust dal 2022.
Cunquai ch'ins aveva er gia fatg quest onn bleras preparativas, examinescha il comité d'organisaziun uss, schebain ins pudess quintar cun ina cumpensaziun finanziala davart dal chantun.
