Siglir tar il cuntegn

Header

audio
Discussiuns animadas e decisiuns surprendentas
Or da Actualitad dals 10.03.2022.
abspielen. Laufzeit 5 minutas 41 Sekunden.
cuntegn

Glion Tempo 30 va memia spert – parlament fraina il project

Tempo 30 n’era en sasez betg sin la glista da tractandas dal parlament communal da Glion. Cun in'incumbensa urgenta ha il parlamentari Claudio Quinter però pretendì ch'i vegnia decidì anc durant la sesida actuala, schebain l'introducziun dal tempo 30 sin l'entir intschess da la citad da Glion duai vegnir sistida.

Franà tempo 30 suenter discussiun extendida

Il parlament ha dà suatientscha a l'incumbensa e discutà extendidamain la proposta. Tscherts parlamentaris eran da l'opiniun che la vischnanca n’haja betg communitgà bain tar quest project. Auters han menziunà ch’i dessia anc autras soluziuns per schliar ils problems dal traffic. Intginas parlamentarias e parlamentaris han sustegnì la proposta da la suprastanza communala. La presidenta communala Carmelia Maissen aveva declerà ch’i sa tractia d’in project communabel cun il chantun Grischun e che lez mainia il project per l’introducziun dal tempo 30.

Decisiun clera cun 17 encunter 6 vuschs

La fin finala ha il parlament decidì cun 17  encunter 6 vuschs ch'i giaja memia spert cun il tempo 30 e pretendì che la suprastanza communala desistia per il mument sin l’introducziun. Co quella decisiun duai vegnir realisada en la pratica n’è anc betg cler. Sch'il chantun desista ussa sin la publicaziun dal project ch'era planisada aifer 10 dis en il Fegl uffizial chantunal, n'ha la presidenta betg pudì dir. Sco i vesa ora per il mument èsi però da quintar che l'introducziun dal tempo 30 a Glion vegn retardada in’ulteriura giada.

Biblioteca da nov en il marcau vegl

La midada da las localitads da la biblioteca davent da la scola da Glion en il marcau vegl ha medemamain procurà per discussiuns. Claudio Quinter ha fatg la proposta da betg entrar en fatschenta. Il lieu previs na saja betg ideal e da reponderar. La votaziun d’entrada ha stuì vegnir repetida duas giadas damai ch’il resultat n’era betg corrects. La finala ha la presidenta dal parlament, Gierina Gabriel stuì dar la decisiun da tagl. Suenter la discussiun da detagl ha il parlament approva la garanzia da deficit per la sanaziun dal bajetg el marcau vegl ed l'auzament dalla contribuziun annuala da 22’000 sin 100’000 francs.

Anc nagina nova plazza per il svilup communal e communicaziun

La suprastanza communala leva introducir ina nova plazza da 60% enfin 80% per dar dumogn als pensums creschents. Il parlament ha critica ch’il profil da lavur saja memia vasts e che la plazza saja da focusar. La fatschenta è vegnida returnada a la suprastanza communala per remedura.

Plinavant ha il parlament approvà la revisiun parziala da la planisaziun locala per il territori da la staziun da viafier. Quella revisiun sto anc vegnir approvada tar ina votaziun a l’urna.  Era ha il parlament concedi in credit da 176’000 francs per midar ora il stgaudament en la chasa da scola a Castrisch.

RTR novitads 06:00

Artitgels legids il pli savens

Scrollar a sanestra Scrollar a dretga