Il studi cun trais variantas per colliar la fracziun da Riein cun il quartier da Signina sa basa sin ina decisiun che la suprastanza communala dad Ilanz/Glion aveva prendì ils 27 d’avust 2025. Lura è vegnì concludì da sclerir tge pussaivladads ch’i dess da surmuntar la Val da Riein.
Las variantas èn vegnidas elavuradas d’inschigniers professiunals e suttamessas da la vischnanca ad in'examinaziun preliminara tras l'Uffizi chantunal da construcziun bassa.
Emprima prioritad en chaussa traversada da la Val da Riein haja, tenor il president communal Marcus Beer, la segirezza. En segunda lingia gioghian ils custs ina rolla decisiva.
Punt, punt pendenta u sanar la cabina
La vischnanca ha laschà evaluar trais variantas co ch'ins pudess surmuntar la Val da Riein. Uschia hajan ins evaluà la construcziun d’ina punt cun pilasters da betun ed ina construcziun da lain sisur. Questa punt sumegliass quella che traversa la Val da Carrera tranter Valendau e Versomi, di Marcus Beer. «Per construir ina tala punt duvrassi mesiras da construcziun considerablas en il funs da la val.»
La segunda varianta ch’è vegnida examinada è ina punt pendenta. Qua saja vegnì fatg in studi davart la realisabilitad d'ina tala punt cun ina lunghezza da circa 100 meters. Quella stess surtut a disposiziun al turissem ed a pedunas e peduns tranter Pardi e Signina.
Sco terza varianta ha la vischnanca laschà evaluar la sanaziun da la pendiculara existenta, tranter Pardi e Signina, che dastga actualmain be vegnir duvrada da possessurs da suloms da Signina.
Il motiv per il studi
Marcus Beer ha declarà en discurs cun la FMR il motiv pertge ch’ins haja evaluà alternativas. Il problem saja che la pendiculara da Riein a Signina saja veglia e la tecnica stuess vegnir renovada per pudair cursar per tut las passagieras ed ils passagiers.
Las lavurs necessarias per tegnair en funcziun la pendiculara e garantir la segirezza dal manaschi sajan vegnidas exequidas. Entaifer ils proxims tschintg onns dovria dentant ulteriuras lavurs da mantegniment, manegia il president communal dad Ilanz/Glion.
Punt nunrealistica
La punt sur l'aual vi, en il funs da la val, saja or dal pugn da vista dal chantun, sco emprima instanza d’evaluaziun, strusch realisabla. Quella punt cuntegnia memia blers aspects da privels e na pudess betg vegnir lubida dal chantun, di Marcus Beer.
La punt pendenta fiss tenor il president communal ina buna purschida, surtut per il turissem da stad. «La punt pendenta custass enturn in mez milliun francs. Il handicap tar ina punt pendenta saja ch’ella na possia betg vegnir utilisada da l’agricultura.»
Tenor Marcus Beer pudessan ils basegns turistics dentant vegnir integrads en la sanaziun da la pendiculara che custass, cun in sistem d’autostart, circa 1,2 milliuns francs. «Nus essan fitg leds d’uss avair in studi da variantas ch’èn ina buna basa per la gruppa da lavur che s’occupescha da la colliaziun Pardi – Signina.»
A la gruppa da lavur appartegnan er ils proprietaris da suloms da Signina. Marcus Beer: «Sche nus realisain in project u l’auter vegni fitg probabel a dar ina procedura da perimeter. Perquai èsi impurtant ch’ils proprietaris da suloms sajan er involvids en la fasa da decisiuns.»
Viadis a pe pretensius
Marcus Beer di, ch’ils viadis a pe da Riein a Signina e da Pitasch a Signina sajan grevs e per part privlus d’absolver. En scadin cas sajan quellas sendas fatgas per ir a pe. Era cun ina punt pendenta sajan las vals memia malsegiras sco ruta da bike. A la fin vegnia il suveran a decider a l’urna davart il credit, di il president communal.