Bea König e Nicoline Schaub èn s’inscuntradas tar la «Fueina da cultura», in’occurrenza da e per glieud ord la scena da cultura a Glion. Ord l’idea preschentada a la «Fueina da cultura» da crear in spazi communal per art figurativ hai anc dà nagut, ma las duas dunnas han suenter l'occurrenza e lur inscunter fundà lur atgna uniun cun in spazi d’art e cultura cun il num Zezzaneera en la Städtlistrasse a Glion.
Nus n'essan betg ina gallaria, nus essan in spazi nua ch'ins po vesair e giudair art. Er sch'ins n'ha fin ussa anc mai gì ina colliaziun cun l'art, pon ins simplamain vegnir e baiver in café.
Bea König è organisatura da cultura ed ha ina gronda experientscha professiunala sin il sectur. Cun emfasa declera ella, ch’il nov spazi d’art na saja betg ina gallaria, mabain in spazi nua ch'ins possia viver e giudair art. Ella agiunta ch'ins possia era simplamain vegnir sperasvi e baiver in café e discutar. Perquai hai ina maisa amez il spazi.
Nicoline Schaub, l’istoricra d’art e medemamain organisatura d’art declera che quai saja in spazi nua che las portas sajan avertas e la curiusadad da la glieud saja bainvegnida.
L'exposiziun d'avertura è deditgada a l'artista Lilly Keller. Visitadras e visitaders han la pussaivladad da betg mo contemplar sias ovras, mabain era da cumprar objects pitschens ord sia collecziun persunala. Sper l'exposiziun dettia l'entschatta zercladur era ina runda da discussiun davart l'artista Lilly Keller. Quai er cun l'artista Talaya Schmid.
Lilly Keller (1929-2018) è stada ina artista svizra, enconuschenta per sias ovras multifaras en pictura, sculptura ed installaziuns d'art. Sia creaziun artistica s'extenda sur plirs decennis e sa caracterisescha entras ina colliaziun unica da natira e linguatg da furma abstracta. Tar sias passa milli ovras tutgan numerusas tapisserias ed inqual installaziun pli gronda. Ella aveva ragischs a Tusaun, nua che la Fundaziun Lilly Keller sa chatta ussa.
Nov lieu da scuntrada e concerts classics
Il concept da Zezzaneera giaja sur exposiziuns d'art tradiziunalas ora. Sper art contemporan, fotografia e design porschia il spazi era plaz per discussiuns ed il barat cultural. Mintga dus mais mida l'exposiziun per garantir varietad e cuntrasts. Nicoline Schaub exprima sia visiun che la glieud sa fidia da vegnir en il spazi cun marveglias cura ch’ella va sperasvi.
Quai è il spazi nua che las portas èn avertas e sche la glieud è mirvegliusa ed gughegia da vegnir en, alura po fitg bler capitar. Alura èsi l'art che fa ei.
Bea König e Nicoline Schaub èn stadas sportivamain da viadi cun lur nov spazi. Aifer in pèr paucs mais han ellas mess en pe il concept, chattà in lieu adattà ed organisà l’imprima exposiziun. Il program per l’entir onn è anc en planisaziun, mo ina chaussa è gia decidida: En la Zezzaneera vegnia sper las exposiziuns d'art en l’avegnir a dar regularmain concerts da musica classica.