Las vischnancas Andermatt, Hospental, Realp e – da l’autra vart da l'Alpsu – Mustér e Tujetsch vulan cun la carta per indigens far pli attractiva la regiun ed il viver en las muntognas. Questa carta da l’onn porscha a tuttas persunas, cun domicil en ina da las tschintg vischnancas, la pussaivladad da nizzegiar la gronda part da l’infrastructura dal temp liber – quai per in pretsch da 333 francs per creschids e 33 francs per uffants tranter 6 e 16 onns.
Integrà en la purschida èn l’access a las pendicularas da Mustér e Sedrun-Andermatt, il pass da loipa d'Andermatt ed il pass da Nordic Surselva, sco era differentas purschidas dal center da sport a Mustér ed il bogn Sedrun. Per promover la cultura è plinavant l’access als quatter museums da la regiun includì.
En tut stattan 17 purschidas da sport e cultura a disposiziun cun la charta. E, sco Martin Cavegn ha ditg, possia en l'avegnir anc dar dapli purschidas, surtut ad Andermatt. Là n’existia per il mument anc betg ina sumeglianta infrastructura communala dal temp liber. Ils proxims onns vegnia quella dentant era realisada da l’autra vart da l'Alpsu, declara il president communal da Tujetsch.
Tgi finanziescha tut quai?
L’iniziativa è vegnida da las duas vischnancas sursilvanas, Mustér e Tujetsch. Igl haja duvrà dapli che dus onns plain contractivas fin che la schliaziun era sin maisa. Surtut las contractivas cun las pendicularas èn stadas impurtantas, senza lezzas na fiss la purschida betg stada attractiva.
La finamira saja che mintga famiglia vegnia da prestar quella charta d'aur. Perquai han las vischnancas vulì far il pretsch uschè bass sco pussaivel, ha il president communal da Tujetsch, Martin Cavegn, declerà.
Mintga famiglia duai pudair prestar quella charta d'aur.
Ils responsabels quintan da vender radund 3’000 da quellas «Golden Cards». Sche quella cifra è cuntanschida, portia la charta sezza la gronda part dals custs. Ils ulteriurs custs vegnian repartids sin las tschintg vischnancas tenor il dumber d’abitants.
Las vischnancas investeschian gia uss en la promoziun da l’economia e – grazia a quella purschida – sperian ellas da daventar pli attractivas ch'autras vischnancas che na porschan betg ina tala carta. Cun quella dovria ussa numnadamain mo pli ina suletta carta da l'onn per ir cun skis, ir a far bogn e far fitness, di Martin Cavegn.
Carta valaivla a partir dal zercladur
La carta pon ins cumprar a partir dals 28 da matg. Valaivla è ella davent dal zercladur. La charta valia mintgamai dal prim da zercladur fin ils 31 da matg.
Per cumenzar è vegnida definì in temp da pilot da trais onns. Annualmain vegnia tratg bilantscha per vesair co la vendita sa sviluppescha e sch’ins po integrar ulteriuras purschidas. Ina purschida pussaivla fiss per exempel da pudair nizzegiar sur onn la Viafier Matterhorn-Gottard cun la carta.
Actualmain è la viafier tranter Mustér ed Andermatt integrada sulet durant l’enviern. La finamira saja dentant da pudair integrar quella purschida dal traffic public era durant la stad, uschia Martin Cavegn.