Planisà era da s’entupar cun l’entira populaziun tuatschina ma la situaziun actuala n'ha betg lubì d'organisar in tal inscunter di Martin Cavegn. Per el era cler ch’el veglia orientar sur da projects futurs e sur dal svilup, ma surtut impurtant saja il barat cun la populaziun, conceda il president ch’è dapi il fanadur en uffizi. Ed era la giuventetgna stoppia en futur survegnir ina vusch per sentir ils basegns. Pertge in dals gronds problems saja la demografia, la perdita da la giuventetgna e quella possia sulet vegnir franada cun la giuventetgna, di Martin Cavegn.
Ord discussiun sa cristallisà quatter quitads
In dals quitads e giavischs da la giuventetgna saja da megliurar las colliaziuns dal traffic public. Sch’ina giuvna u in giuven haja dad ir a Glion u a Cuira per far ina scola, alura manchia la colliaziun ad uras ed ils geniturs stoppian far il transport fin a Mustér. Qua saja la vischnanca uss dumandada da chattar ina soluziun, era senza forsa midar ils uraris sez, ma cun iniziativa. Ina schliaziun a lunga vista pudess er esser che la Viafier retica vegn fin en Tujetsch e lura fiss la colliaziun baud gia dada, argumentescha Martin Cavegn.
Dapli abitaziuns e dapli plazzas da lavur
Dus auters puncts da discussiun èn stads las plazzas da lavur e d'emprendissadi. Qua saja en il temp dad oz grond potenzial da svilup. Uschia pudess la vischnanca tschertgar ina collavuraziun cun interpresas grondas che porschan alura la pussaivladad da lavurar da chasa anora ed uschia per exempel porscher plazzas decentralas. E cun discutar cun las interpresas indigenas possian ins en futur forsa porscher dapli emprendissadis e surtut era differents, di il fiduziari e nov elegì president communal.
Ed era tar las abitaziuns favuraivlas saja la vischnanca dumandada da chattar soluziuns. Cun ils projects actualas, sco per exempel il resort Dieni, pudess la vischnanca vegnir activa e cumprar abitaziuns per laschar a tschains ellas a la giuventetgna ed ad indigens per in pretsch favuraivel.
«La Talina» vegn renovada
Ina chaussa ch’els vegnian immediat a prender a mauns è la renovaziun dal local da giuventetgna «La Talina». Quai saja necessari ed ina chaussa ch’ins possia realisar a moda svelta e nuncumplitgada, di Martin Cavegn. Era gia organisà è il proxim inscunter cun la giuventetgna. Quel vegnia ad avair lieu ils 27 da mars 2021 ina sonda saira a las set puspè digital ed alura saja l’idea da cuntinuar cun inscunters mintga quartal.
