Guerra a Mustér - Ficziun en culissa istorica: teater «1799 – Revolta ella Cadi»

Sut tschiel avert a Mustér, gist sper la claustra, vegni cumbattì, discutà e sbragì. Per l’emprima giada vegn il teater «1799 – Revolta ella Cadi» giugà al toc. Il reschissur René Schnoz persequitescha quai che succeda e dat ultimas instrucziuns.

Sin il palc stattan sper amaturs er acturs professiunals. Per l’actur e pedagog da teater David Flepp fa gist quella maschaida il stimul da la producziun. Durant emnas han ils involvads fatg communablamain emprovas e lavurà pass per pass en lur rollas.

In toc davart ils eveniments da guerra dal 1799

Il toc fictiv da l’autur Hubert Giger tracta ils eveniments da l’onn 1799, cur che truppas franzosas ed austriacas èn sa scuntradas er en Surselva. La guerra è la culissa istorica. Raquintadas vegnan cunzunt las istorgias da quels umans che han stuì viver amez las dispitas politicas e militaras.

Per il reschissur René Schnoz è il tema pretensius. Preschentar guerra sin ina tribuna da teater saja ina sfida tut speziala. Ed il medem mument saja impurtant da betg mo mussar cumbat e violenza, mabain d’augmentar adina puspè in pau l’atmosfera.

Survista da las inscenaziuns

In tema istoric cun impurtanza actuala

Cumbain che l’istorgia è passa 200 onns enavos ha quest tema in effect surprendentamain actual. Guerras e conflicts armads caracteriseschan er oz numerusas regiuns dal mund. Gist perquai animescha il toc da reflectar.

Il teater mussa che la tema, la malsegirezza e la speranza èn experientschas che pon colliar umans sur generaziuns.

Il pli grond project da l’uniun da teater

Cun 30 acturas ed acturs e radund 20 statistas è quai il project il pli grond che l’uniun da teater «dentervals» ha mess en pe ina giada. Sustegnì vegn il teater cun contribuziuns musicalas ch’èn vegnidas registradas ordavant da 50 chantaduras e chantadurs. Cun in budget da radund 600'000 francs porscha l’uniun nov represchentaziuns durant differents dis il mais d’avust.

Impressiuns da la prova