La maioritad dals osps da l'hotel 7132 e da la terma na vegnian betg per in'entira emna a Val, glindesdi e mardi èn ils dus dis flaivels. Serrar dus dis per emna munta ch'i dovra pli pauc persunal, Roman Frauchiger po uschia dentant dar contracts nunlimitads a tut ils emploiads e tegnair avert l'hotel e la terma l'entir onn. E cun quai che contracts nunlimitads èn pli interessants che contracts stagiunals, spera il directur era d'attrair bun persunal ed augmentar uschia la qualitad dal servis.
Sco Roman Frauchiger ha ditg al Regionaljournal Graubünden da SRF n'haja dà naginas relaschadas pervi da quest test, ina fluctuaziun normala la fin da la stagiun d'enviern haja lubì da reducir avunda il dumber da persunal. Quant ditg che quest test nunusità per in hotel da luxus cuzza anc n'è betg definì.
Consequenzas per Val
Tenor il manader dal center da cumpetenza turissem da la scola auta a Lucerna, Urs Wagenseil, ha quai test plitost paucas ni naginas consequenzas per l'hotel ni la terma. I na vegnia gie betg serrà dal tut e la finala sajan hotel e terma uss averts l'entir onn. Per il vitg da Val possia quai dentant avair consequenzas negativas. La terma saja in magnet che tiria blers giasts en il vitg, e sche quel manchia, muntia quai damain clients era per autras fatschentas en il vitg.
Il president communal da Val, Stefan Schmid, relativescha dentant las consequenzas. Cler na saja betg bun che la terma saja uss serrada dus dis, positiv saja dentant, che la terma è persuenter averta l'entir onn. Fin uss saja ella stada serrada pliras emnas durant la stagiun bassa.
RR novitads 06:00
Ord l'archiv
01-03-2001: Ins po reservar in'entrada be via internet – quai chaschuna critica
