Tenor il president communal da Mustér, René Epp, è quai in impurtant pass. Sche tut giaja bain saja el da buna speranza ch'il nov hotel Acla da Fontauna stettia en dus u trais onns. I saja ina garanzia ch'il hotel vegn bajegià.
Jau crai propi che nus vegnin a vesair quest hotel a Mustér en dus u trais onns.
Il project è dotà cun tranter 90 fin 100 milliuns francs. Planisadas èn 150 fin 200 chombras, abitaziuns secundaras ed abitaziuns administradas. Il vegl hotel Acla da Fontauna, che ha gì ses temp glorius en ils onns 70, è vegni spazzà avant dus onns. Dapi il 2018 ha la Immo Invest Partner SA da Turitg investì radund 20 milliuns francs en il project da l'hotel – quai davent da la planisaziun, sur la spazzada da l'hotel vegl, fin tar la realisaziun da la via da quartier.
Investurs betg a la saira d'infurmaziun
Las persunas responsablas da la Immo Invest Partner SA n'èn betg stadas preschentas a la saira d'infurmaziun per la populaziun. Il motiv è ch'il plan concret da termins da l'entir project na saja anc betg enconuschent. Els vegnian dentant ad esser da la partida a la proxima saira d'infurmaziun che duai avair lieu la fin d'avust. Lura vulan els er infurmar cura che tge capita exact.
Sche tut sa sviluppa tenor plan, pudess l’anteriur hotel da tradiziun, ch’ha vivì ses temps glorius ils onns 70, vegnir revitalisà en paucs onns e puspè daventar in lieu central per il turissem en la regiun.
