L'independent Martin Capeder ha 49 onns. El è creschì si a Castrisch e viva cun sia famiglia a Duin. Sco vicepresident da la vischnanca dad Ilanz/Glion ha Martin Capeder substituì la primavaira passada il president Marcus Beer durant trais mais.
Gia a la fin da questa perioda aveva Martin Capeder ditg envers la FMR che la substituziun saja stada in'experientscha positiva per el. Uss ha el decidì da candidar: «Jau hai gist inoltrà mia candidatura tar la chanzlia Ilanz/Glion e fiss fitg motivà da surpigliar il presidi da nossa vischnanca.»
Dal 2009 fin la fusiun il 2014 ha Martin Capeder presidià la vischnanca da Duin. Silsuenter è el stà commember dal parlament dad Ilanz/Glion e dapi il 1. da schaner 2023 fa el part da la suprastanza communala.
Quinter n'ha betg quaidas
«Per mai persunalmain na vegni plitost betg en dumonda da candidar per il presidi da la vischnanca dad Ilanz/Glion», di l'interprendider d’immobiglias Claudio Quinter ch'appartegna al Center, sin dumonda da la FMR. «Jau hai interpresas che marschan bain e sun uss en in’autra responsabladad professiunala che l'onn 2022 cura che jau hai candidà l'emprima giada per il presidi.»
Avant quatter onns aveva Claudio Quinter pers 95 vuschs sin Marcus Beer, uschia che lez è vegnì elegì sco president communal. Claudio Quinter: «Là hai jau candidà ed avess anc pudì ma distatgar bain da mes affars. Ma ussa na va quai betg pli.»
Dietrich na vul era betg pli
Circa en la medema crena sco Claudio Quinter dat era Silvio Dietrich da la Partida socialdemocratica (PS). Sco Claudio Quinter è er el stà candidat per il presidi gia avant quatter onns. Silvio Dietrich ha ditg ch'el saja vegnì dumandà uss da pliras varts, sch'el candideschia anc ina giada per il presidi da vischnanca: «Jau sun stà ina giada a disposiziun avant quatter onns. Da quellas uras na sun jau betg vegnì elegì. Jau sai viver cun questa decisiun da nossas votantas e noss votants. Jau n'hai tuttavia betg spetgà sin la chaschun da candidar anc ina giada.» Tenor Silvio Dietrich vul la PS prender la peda ch'ella dovra per ponderar, sch'ins vul ir cun ina candidata u in candidat en la cursa electorala.
Il segund num che fa la curella ad Ilanz/Glion è quel da la socialdemocrata Michal Hohl ch'è actualmain era suprastanta communala. Ella n'è pervi da vacanzas betg stada cuntanschibla per ina posiziun.
Campagna electorala en vacanzas
Ils presidents da las partidas localas dad Ilanz/Glion e da la Surselva èn stads plitost reservads cun numnar candidatas e candidats. Uolf Candrian che presidiescha la secziun sursilvana da la PS ha ditg sin dumonda da la FMR che la nominaziun dad ina candidata u dad in candidat na saja anc betg stada in tema en sia secziun. «Nus guardain ussa tgi che candidescha e decidain lura vinavant.»
Nagin uffizi tschertgà La Partida liberaldemocratica da la Surselva che n'ha nagin che vul ir en ils stadals per il presidi dad Ilanz/Glion. Il president da la partida, Hanspeter Bundi, ha fatg a savair ch'ins haja fatg ina emprima discussiun en la suprastanza, ma che l'interess saja plitost pitschen. Quai fin ad ina persuna che n'haja anc betg pudì sa decider. Il num da quella persuna n'ha el dentant betg vulì numnar.
Er en il Center n'è la campagna electorala anc betg tema. Claudio Quinter, il president da la partida ha ditg envers la FMR ch'ins vegnia proximamain a discutar, sch'ins veglia sa participar cun ina candidata u cun in candidat a l'elecziun dal nov president communal.
L’elecziun dal presidi dad Ilanz/Glion ha lieu ils 27 da settember 2026. Il nov president u la nova presidenta entra en uffizi il 1. da schaner 2027.