Suenter in'operaziun dal cor il favrer na sa sentia el betg pli uschè fit sco avant, di il president da Glion Marcus Beer. El vegn pli spert stanchel ed era la motivaziun e la concentraziun mancan mintgatant. Pervi da quai na sa sentia el betg fit avunda per il post sco president communal.
Marcus Beer è dapi il 2022 en uffizi. El è vegnì elegì sco successur da Carmelia Maissen e l'onn passà vegnì reelegì per ina segunda perioda d'uffizi che durass fin il 2029. Ses uffizi dat el giu pir la fin da quest onn – uschia ch'i resta temp avunda per chattar ina successura u in successur.
In emprim scrutini per chattar ina successura u in successur ha lieu la fin da settember – sche necessari datti anc in la fin da november, uschia che Glion ha davent dal prim da schaner 2027 in nov president u ina nova presidenta communala.
- creschì si a Breil ed ha fatg il gimnasi a Mustér
- studegià giurisprudenza a l'Universitad da Friburg
- stà prorectur da la scola mercantila a Glion
- dapi l'onn 1991 scolast per roms economics en il Center da furmaziun Surselva a Glion
- ha manà 11 onns la Scola media spezialisada e commerziala sco er la Scola mercantila en il Center da furmaziun Surselva a Glion
- dapi 2022 president communal da Glion
Tenor Marcus Beer dovra la persuna che surpiglia ses post bler engaschi. Il post sco president da Glion, ch'è dotà cun ina pensum da 80%, porta numnadamain autras sfidas che tar ina vischnanca pli pitschna: «Sco vischnanca da center èsi simplamain uschia, ch'ins ha propi da purtar ina gronda chargia – nus n'avain nagin manco da projects e da lavur.»
Ins sto esser diplomatic ... forsa in zichel pli diplomatic che jau en tschertas situaziuns.
Schebain l'eclat l'entschatta da l'onn haja er influenzà sia decisiun da demissiunar, n'ha Marcus Beer betg vulì commentar. Durant la surdada d'ina petiziun il favrer ha il president communal numnadamain reagì fitg emoziunal. Il video da sia reacziun ha procurà per lingias grassas en l'entira Svizra, e perquai cusseglia el a sia successura u a ses successur, cun in surrir: «Ins sto esser diplomatic ... forsa in zichel pli diplomatic che jau en tschertas situaziuns.»
Nagina dumonda da confidenza il favrer
Gia il favrer ha Marcus Beer tratg en consideraziun da demissiunar. La dumonda da confidenza da Marcus Beer n'ha il parlament dentant betg tractà damai ch'i na dettia nagina basa legala. Uschia è il tema stà giud maisa.
Raschun per la dumonda è stada ina petiziun e la reacziun dal president communal. Ils petiziunaris e las petiziunarias han filmà la surdada a la vischnanca nua che Marcus Beer ha reagì emoziunalmain. Pliras medias han publitgà ils videos.