Glion: Eclat enturn petiziun - Parlament da Glion refusa debatta davart Beer
Cun 1'686 suttascripziuns han petiziunaris e petiziunarias surdà a la vischnanca da Glion ina petiziun che pretenda da pudair pajar ils parcadis publics cun daners bluts. Durant la surdada hai dentant dà ina dispita che daventa in cas giuridic. Il president communal ha fatg la dumonda da confidenza.
Passa 50 persunas èn vegnidas a la sesida dal parlament a Glion per guardar sch'il parlament tracta la dumonda da confidenza en il president communal. Quel ha laschà sentir la gruppa da petiziun durant la surdada da la petiziun tge ch'el pretenda dad els.
Nagina basa legala
Ma capità n'è nagut. Schebain ch'il president communal avess giavischà la votaziun, u almain ina discussiun en causa, ha il nov elegì president dal parlament, Flavio Elvedi, betg laschà tiers quai.
La dumonda da confidenza – in med betg valaivel
Avrir la boxSerrar la box
Ina «procedura da relaschada d'uffizi» (Amtsenthebungsverfahren) n'exista tenor l'Uffizi da vischnancas dal Grischun betg. Ina dumonda correspundenta da Marcus Beer al parlament saja cumplettamain politica per lura pudair decider sez sin basa dal parairi dal parlament. Er sch'il parlament fiss vegnì a la conclusiun ch'il president communal duaja sa retrair, na fiss quel or da vista giuridica betg obligà da far quai. Sco Damian Manser da l'Uffizi da vischnancas ha ditg sin dumonda da RTR, saja il term «dumonda da confidenza» forsa in zic disfortunà.
En il cas ch'il president communal fiss sa retratg, avess il vicepresident surpiglià fin las elecziuns substitutivas. Extraordinari na saja quai betg ch'in president u ina presidenta communala sa retiria durant il temp d'uffizi. In cas sco quel a Glion nua ch'in president u ina presidenta ha fatg dependent sia decisiun da l'opiniun dal parlament n'è betg enconuschent tar l'Uffizi da vischnancas.
Curt e precis ha el declerà ch'i na dettia nagina basa legala ni per ina votaziun ni per ina discussiun. Cun quest agir ha il nov president dal parlament prendì il vent da las alas a la tematica ch'è chargiada emoziunalmain ed ha laschà esser la causa per bain.
Tge è la raschun per la dumonda da disfidanza?
Sco igl è da vesair en dus videos che RTR ha survegnì dals petiziunaris e petiziunarias, hai dà in cumbat da pleds emoziunal e direct tranter la gruppa da persunas ch'ha surdà la petiziun ed il president communal da Glion, Marcus Beer.
Legenda:
Marcus Beer è dapi il 2022 en uffizi. Il matg passà è el vegnì reelegì en sia segunda legislatura. Quella cuzza dals 2026 fin 2029.
RTR
Ils videos avevan ils petiziunaris tramess ensemen cun lur communicaziun davart la surdada da la petiziun e lur pretensiuns. La petiziun pretenda da pudair pajar ils parcadis publics cun daners bluts. 1'686 persunas han suttascrit quella.
TelesguardSuenter l'eclat a Glion: Marcus Beer fa la dumonda da confidenza
Tenor chapitel 6. da las directivas publicisticas da l’SRG SSR respecta la redacziun ils dretgs da persunas. Quai vala er per persunas ch’han experientscha cun medias – sco per exempel in president communal.
Er quellas han il dretg da l'agen maletg e da l'atgna vusch. Vul dir: Quellas persunas pon er far valair che videos da sequenzas emoziunalas na vegnan betg publitgadas.
L'istorgia – e per part er ils videos – è vegnida publitgada en las medias. Sin quai haja Marcus Beer survegnì numerusas reacziuns da tut la Svizra. Sco ch'el ha ditg en discurs cun la FMR vul el far ils 18 da favrer la dumonda da confidenza al parlament. Sche la maioritad da la legislativa giavischa ch'el demissiunescha, vegnia el a far quai.
Denunzia penala cunter petiziunarias e petiziunaris
Curt suenter la charplina ha il president communal lura communitgà ch'el haja fatg ina denunzia penala en chaussa perquai che la gruppa da persunas haja filmà, fotografà e derasà quest material senza ses consentiment e senza il consentiment dal collavuratur da la vischnanca. Quai saja ina violaziun severa dal dretg da la persunalitad. El vegnia er ad ir la via dal dretg civil encunter la gruppa da persunas, uschia Marcus Beer vinavant.
Suenter quella communicaziun ha la gruppa da persunas che ha surdà la petiziun, retratg tut lur fotografias sco er ils videos ch'els avevan tramess a las medias.
Proxim pass – iniziativa communala dal pievel
Sco ils petiziunaris e las petiziunarias han scrit en lur communicaziun, vegnian els a lantschar immediatamain ina iniziativa dal pievel, sche la vischnanca na reageschia betg entaifer trais mais cun realisar la midada pretendida. Rimnar las 150 suttascripziuns necessarias na saja tenor els nagin problem.
Tge pretendan ils petiziunaris e las petiziunarias?
Avrir la boxSerrar la box
La petiziun pretenda ch’i duai vinavant esser pussaivel da pajar parcadis cun daners bluts a Glion.
Cun abolir quella pussaivladad vegnia ina part da la populaziun discriminada, hai num en la communicaziun. Persunas che na pon u na vulan betg pajar cun meds digitals – per exempel persunas pli veglias, persunas senza telefonin u persunas cun impediment – vegnian exclusas.
La lingua en la communicaziun dals petiziunaris è per part fitg dira: I sa tractia d’ina «furma dad apartheid», scrivan ils petiziunaris. Plinavant saja il pajar be digital ina «schicana» per persunas indigenas e turists. Blera glieud saja avisada sin las plazzas da parcar – per exempel persunas che han in termin a Glion. Sch’ins na possia betg pajar cun daners bluts possia quai esser per tschertas persunas schizunt in «burdi psichic». In auter argument dals petiziunaris è che la populaziun veglia sezza decider co ch’ils raps per ils parcadis vegnian rimnads. L'argument ch’uras da parcar custian memia bler na saja perquai betg valabel, uschia la gruppa da petiziunaris.
Glion reveda l'urden da parcar
Il context è il suandant: En tscherts lieus a Glion èn uras da parcar vegnidas demontadas, cun quai ch’ellas na rendian betg. Ils custs sajan memia auts. I dat dentant anc adina plazzas da parcar cun uras.
Actualmain vegn er revedì l'urden da parcar. Quel prevesa che l’emprima mes’ura parcar duai en futur esser gratuita.
La discussiun dal pajament senza daners bluts na preoccupa betg be la vischnanca da Glion – ma l'entir Grischun. Ina petiziun hai dà tranter auter a Panaduz – e dapi ils 14 december na pon ins betg pli cumprar bigliets tar il chauffeur en l'auto da posta.
