Durant che l'urden da parcar nov da la vischnanca Ilanz/Glion vegn actualmain tractà da las instanzas communalas, han las chasadas dad Ilanz/Glion survegnì ils dis avant Nadal ina glista da suttascripziuns cun ina petiziun a la suprastanza communala. Quella pretenda da pudair pajar cun daners bluts sin tuts ils parcadis publics da la vischnanca dad Ilanz/Glion.
Nus pretendain da la suprastanza communala da la vischnanca Ilanz/Glion che tuts ils parcadis publics en vischnanca possian era vegnir pajads cun daners bluts a partir dad immediat.
Quai è l'emprima construcziun dal text ch'ils iniziants ed iniziantas da la petiziun han distribuì l'onn passà en tuttas scaffas da brevs da la vischnanca dad Ilanz/Glion. Ils petiziunaris scrivan che la pussaivladad da pajar ils parcadis mo cun meds digitals saja ina discriminaziun da tut quellas e quels vischins u d'ordaifer che sajan surdumandads u che na veglian betg pajar lur parcadi cun meds digitals.
Finamira saja d'optimar, betg da discriminar
Ils responsabels da la vischnanca Ilanz/Glion èn surstads che l'engrondiment da las pussaivladads da parcar en vischnanca munta ina discriminaziun per ils petiziunaris. Ina petiziun saja in instrument per vischinas e vischins cun domicil en vischnanca. La petiziun lantschada ussa na correspundia betg dal tuttafatg als fatgs che sajan avant maun. Sco il manader da la chanzlia Michael Spescha ha ditg sin dumonda da la FMR na veglia nagin discriminar persunas che parcheschian lur autos sin territori da vischnanca. L'urden da parcar nov sa basia sin ponderaziuns extendidas stipuladas en la lescha che saja vegnida preparada d'ina cumissiun e deliberada dal parlament communal.
Tractament inegual
Las auturas ed ils auturs da la petiziun han ditg envers la FMR che la situaziun ussa a Glion saja ina furma d'apartheid: Tgi che paja digital dastgia parcar dapertut e quels che na sappian u na veglian betg pajar digital, dastgian parcar mo en tscherts lieus, uschiglio vegnian els chastiads.
Plirs lieus cun munaida
Il chanzlist communal Michael Spescha accentuescha ch'i saja pussaivel actualmain da pajar en plirs lieus cun daners bluts. Era possia ins retrair vignettas al spurtegl da la controlla d'abitants cunter daners bluts. Michael Spescha declera ch'il princip da commensurabladad vegnia applitgà cun realisar ils proxims pass. I vegnia a dar plirs lieus en vischnanca cun parcadis ch'ins possia pajar cun daners bluts. «In da quels parcadis è la plazza fiera da Glion, plinavant ils parcadis en vischinanza dal bogn avert sin l'areal Fontanivas, quel sper l'anteriur Migros ed in lieu en il quartier da Sontga Clau sur il punt dal Rain.»
Emprima mes'ura gratuita
Il nov urden da parcar prevesia ultra da quai era che l'emprima mes'ura da parcadi saja gratuita, e quai sin tuts ils parcadis sin intschess da Glion. Quellas midadas vegnian realisadas en il decurs da l'emprim mez onn 2026. Sin l'areal da la nova staziun dettia era ina purschida da parcadis gratuits per persunas che portian u vegnian per viagiaturs dal traffic public.
Introducir las 30 minutas gratuitas e mantegnair las taxas per ura sin il nivel actual n'è betg pussaivel sch'igl è da montar supplementarmain pliras novas uras da parcar.
La cumpra d'ina ura da parcar chaschuna tenor la vischnanca Ilanz/Glion custs da passa 5'000 francs, di Michael Spescha. La demontascha da las uras da parcar veglias saja stada necessaria pervia da defects e disturbis.