Dapi il prim da december ston ins pajar a Panaduz per parcar. L’emprima mes’ura è gratuita. Suenter custa mintg’ura in franc. In pèr persunas èn malcuntentas perquai ch’ins na po betg pajar dapertut cun daners bluts. Ina petiziun cun 437 suttascripziuns – var 200 da Panaduz – pretenda, ch’ins po puspè pajar cun daner blut sin tut ils parcadis. Actualmain datti mo pli nov parcadis, nua ch’i vegn acceptà munaida.
Il problem è ch'ils parcadis nua ch'ins po anc pajar cun daners bluts èn fitg lunsch davent. E quai è per ina persuna che na sa betg ir uschè bain a pe, ma vul tuttina pajar cun daners bluts, in problem. Quai na po betg esser.
Il president communal Marcel Bieler manegia che la vischnanca haja guardà da na dischavantagiar nagin.
Nus avain conscientamain guardà che nagin na vegn dischavantagià pervia da sia vegliadetgna, pervia d’ina restricziun corporala u pervia da la mancanza da meds digitals.
Ils parcadis cun pajament en daner blut sajan cuntanschibels. Ins possia er ir cun in auto tar in automat, là cumprar in bigliet cun munaida e suenter parcar sin mintga parcadi en vischnanca. Quella nova regulaziun è anc en la fasa da test.
Ina decisiun definitiva na datti anc betg. Sch'els badan ch'i dovra anc in auter automat cun la pussaivladad da pajar cun raps bluts vegnan els probabel era ad organisar quel.
Nagina cumpra da bigliets tar il chauffeur en l’auto da posta
La discussiun dal pajament senza daners bluts na preoccupa betg be Panaduz, ma l'entir Grischun. Dapi ils 14 december na pon ins betg pli cumprar bigliets tar il chauffeur en l'auto da posta. Enstagl da quai dettia en l'auto da posta ussa era, sco gia en il bus da Cuira, in automat da Venda.
Enturn 75% dals bigliets vegnan ozendi di gia cumprads a moda digitala. Quai simplifitgeschia bler.
Igl era simplamain ina fitg gronda lavur cun ils daners bluts. Ins stueva dumbrar ils daners, dar ora els, rimnar puspè ed adina avair avunda munaida per pudair dar enavos il rest.
Sch’i dat pli paucas cumpras da bigliets tar il chauffeur han els in avantatg. Ils chauffeurs e las chauffeuras pon lavurar pli stabil ed manegnair meglier l’urari. Quai ha emprima prioritad.
Betg per tuts ina soluziun
I dat persunas ch'han in problem cun questa midada. Rafael Camenisch è responsabel per ina petiziun cunter il pajament senza raps bluts en l'auto da posta.
Jau chat che quels che vulan pajar digital, quels duain savair far quai. E sche insatgi paja taglia e ses bigliets – e vul far quai cun daners – na pon ins betg stritgar quai.
Spezialmain pertutgadas sajan persunas pli veglias, persunas cun impediments ed uffants. Quellas persunas sajan numnadamain surdumandadas cun la digitalisaziun. Plinavant dettia persunas che n'han nagina carta da banca.
Venda Prepaid u Swisspass
Sco alternativa dals daners bluts e ch'ins no sto betg pajar digitalmain u cun la carta da banca dettia ina carta ch'ha num Venda Prepaid.
Dasper quella pon ils passagiers e las passagieras era anc pajar cun il Swisspass. Ina da las cartas tegn'ins lura envers l'automat da Venda. Quel quinta giu il pretsch dal viadi. A la fin dal mais survegnan ins lura in quint final – u cun la posta en furma da palpiri u in furma digitala.