Dapi il 2023 pon ins en il Grischun cumprar bigliets per il traffic public als uschenumnads automats da Venda. La partenza è stada crappusa, ils automats n'èn betg stads bainvis tar la populaziun. Il sistem saja memia cumplitgà, per persunas pli veglias saja quai memia privlus da retrair in bigliet en il bus che viageschia u ch'ils automats na funcziunian betg adina, hai gì num da critichers.
La purschida da l'automat da «Venda» duai dentant vegnir extendida. Actualmain vegn testada ina funcziun supplementara a Cuira. Ins po ussa entrar en il bus, tegnair sia carta da debit u da credit vi dals automats e prender plaz. Cura ch'ins sorta, ston ins tegnair la carta mo anc ina giada vi da l'automat. Il sistem registrescha uschia mintga viadi ch'è vegnì fatg e tira giu a la fin dal di il pretsch d'in bigliet correspundent.
Mesa taxa e pretsch per uffants
Per che la reducziun dal pretsch da l'abunament da mesa taxa e dal pretsch per uffants vegnia resguardada, ston ins colliar il Swisspass ina giada cun il med da pajament vi da l'automat.
- Tippar sin il monitur sutvart a sanestra sin «Swisspass verknüpfen für Venda Go».
- Eleger «Hinzufügen».
- Tegnair la carta da pajament a l'automat da vendita.
- Scannar il Swisspass.
Suenter vegn la reducziun resguardada automaticamain tar mintga utilisaziun.
Emblidà «tap out»?
Sch'ins emblida da far l'uschenumnà «tap-out», vegn calculada la fin dal di ina carta dal di per la zona 150 che custa 6 francs, respectivamain 4,40 francs. In tap out po dentant vegnir prendì suenter a mintga automat giavischà.
Co vai vinavant?
En il futur veglian ins schlargiar la purschida sin tut il chantun. Cura ch'il sistem vegnia schlargià na sappian ins dentant betg anc, ha Sascha Streule, manader dal servetsch per clients, ditg ad RTR. Sin tut ils automats vegn il sistem vertent dentant ad star vinavant a disposiziun (cun Swisspass e cun elecziuns da zonas).
Sascha Streule è manader dal servetsch per clients tar la Bus und Service AG (BuS AG) e responsabel per la funcziun da Venda. El lavura pia per il bus da Cuira e per il bus d' Engiadina e serva sco giuncziun per il project dals automats da Venda.
Ch'ins possia cumprar in bigliet tar il manischunz dal bus u tar la manischunza dal bus na vegn dentant vinavant betg pli ad esser pussaivel.