Avant in onn è vegnì introducì il nov sistem da bigliets «Venda». Cun quest sistem han ins la pussaivladad da cumprar bigliets en furma digitala. Quai pon ins far a la staziun u en il bus. A l'entschatta hai dà fitg blera critica envers quest sistem – i saja memia cumplitgà e grev d'utilisar. Suenter in onn è la glieud sin via anc adina da la medema opiniun.
Jau hai udì da persunas ch'èn crudadas, perquai ch'il manischunz è gia partì avant ch'ellas han pudì cumprar il bigliet.
Il manader dal servetsch da clients tar «Bus und Service AG», Sascha Streule, ha er udì quella critica. El di dentant, che las reacziuns sajan sa meglieradas l'onn passà. Tut tenor regiun saja quai different, en l'Engiadina sajan ils resuns stads da l'entschatta positivs.
La difficultad la pli gronda è simplamain stada la midada, di el. Sch'insatge è nov, datti bleras persunas che na dovran simplamain betg il sistem. Quai han ins era sentì tar la glieud sin via – bleras persunas han in abunament, sco p.ex. in Büga. Sascha Streule di ch'i saja difficil da dir precis quantas persunas che dovrian «Venda». Ma i saja cleramain dapli glieud che dovra «Venda» ch'il sistem vegl.
Plus minus èn 9'000 persunas registradas tar Vendaprofit.
E quai malgrà ch'igl ha dà blera critica a l'entschatta. Ina critica concreta è il privel per glieud veglia da crudar, perquai ch'il manischunz dal bus parta gia avant ch'ella ha cumprà il bigliet. Sascha Streule ha fatg patratgs latiers. El accentuescha ch'il manischunz u la manischunza haja in urari da resguardar. Els emprovian da spetgar, ma els na pon betg adina spetgar.
La finamira da «Bus und Service AG» saja tenor Sascha Streule in sistem da «tap in/tap out». Quai munta ch'ins tegna curt sia carta vi d'in automat (tap in) cura ch'ins entra e cura ch'ins sorta anc ina giada (tap out) per pajar il viadi cun il bus.
Il sistem «Venda» na saja anc betg uschè lunsch sco quai ch'el possia esser, di el. Ma els lavurian vidlonder.