Suenter l'introducziun dal sistem da bigliet «Venda» a Tavau en il december 2022, ha Cuira introducì il nov sistem il favrer 2023.
Cun la lantschada èn ils problems vegnids. Ils apparats da cumprar bigliets cun cartas, Twint ni Swisspass, avevan problems da colliaziun ed il code PIN da la carta dal Swisspass è vegnì dumandà giu pli savens che quai ch'i fiss en sasez stà planisà. Las vuschs criticas eran d'udir stediamain.
Ils davos mais, ha l'interpresa «Bus und Service» SA schlià ils problems existents. Tenor Janine Gassner, la a manadra dal stab da la direcziun dal Bus da Cuira, funcziuna Venda ussa stabil. Ils resuns dals giasts èn, tenor ella, positivs.
Scolaziuns per glieud attempada
La glieud che dovra sustegn cun il diever dals apparats, ha la pussaivladad da s'annunziar per scolaziuns. Organisà vegnan quels dal Bus da Cuira ensemen cun la Pro Senectute. Là emprendan las persunas co ch'ins cumpra in bigliet cun ils apparats novs. Ultra da quai fan ellas exercizis da stabilitad per ch'ellas survegnan segirtad da cumprar in bigliet, era sch'il bus è en moviment. Igl n'è, tenor Janine Gassner, betg pussaivel ch'il chauffeur ni la chauffeusa spetga fin che mintga persuna sesa en il bus. L'urari dal bus stoppia vegnir resguardà.
Per che betg tuttas e tuts glieud stoppian cumprar in bigliet en il bus, datti insaquantas fermadas che han gia installà in automat fix. Ulteriurs èn anc en planisaziun.
Per part anc problems
Mintgatant ha «Venda» anc intgins problems cura ch'in passagier u ina passagiera vuless cumprar in bigliet. Quai senta p. ex. er ina dunna en il bus da Cuira ch'è gist londervi da cumprar in bigliet. Ella vul cumprar in bigliet cun il Swisspass ma la roda sin l'apparat da «Venda» gira e gira. In bigliet na vegn betg chargià sin il Swisspass, la transacziun è vegnida interrutta. La dunna mida l'apparat e là funcziuna tut. Tenor ella n'è quai sistem betg il «vair» per la glieud veglia. Ella è da l'avis ch'ins stuessia adattar il sistem pli fitg per persunas veglias. Autras persunas dian ch'ells han sa disà al nov sistem da cumprar bigliets. A partir da la fin d'avust 2023 datti Venda era sin lingias en l'Engiadin'Auta.