Il nov sistem da cumprar e pajar bigliets dal traffic public «Venda» na funcziuna anc betg propi bain. Sco las gasettas da Somedia scrivan, datti problems da pajar, u er da sa registrar da nov per duvrar il sistem. Tenor Thierry Müller saja quai dentant normal tar midadas da quella dimensiun. El è manader da la partiziun traffic public dal chantun Grischun.
Tar in sistem nov e spezial saja usità ch'i dettia anc problems al cumenzament. Dapi schaner pon utilisaders ed utilisadras dal traffic public a Cuira pajar ed arcunar lur bigliets cun lur Swisspass u lur carta da banca.
Bainbaud er en l'Engiadina'Ota
Pervia dals defects cuzza la fasa d'introducziun ussa in mais pli ditg. E fin la fin d'avrigl resta, dasper il nov sistem era anc il vegl sistem da bigliets en funcziun.
Sco proxim vegn il sistem introducì la stad en l'Engiadin'Ota. A Tavau è el gia en funcziun dapi il december.
