Il sistem da vender bigliets dal traffic public grischun «Venda» va en la segunda fasa. A partir da l'atun 2024 duajan ins chattar automats da bigliets electronics sin tut las staziuns da la Viafier retica, en tut las postas sco er en ulteriuras interpresas da transport grischunas. Quai han ils organisaturs annunzià en ina communicaziun. La RHB – ch'è il pli pertutgada dals proxims pass davart il project «Venda» – surpiglia la coordinaziun da questa segunda fasa.
«Venda» – in project communabel da las interpresas da transport dal Grischun – è vegnì introcì l'emprima giada a Tavau il december 2022 e durant il 2023 lura er a Cuira ed en l'Engiadin'Ota. Suenter tscherts problems tecnics a l'entschatta da l'introducziun ha l'emprima fasa tenor la communicaziun pudì vegnir terminada cun success.
Il process da cumpra duaja vegnir meglierà
In focus da la segunda fasa vegn – sper l'introducziun dals automats en l'entir Grischun – er ad esser da far pli effizient e simpel la cumpra dals bigliets electronics. Ils clients e las clientas duajan tenor ils organisaturs da «Venda» pudair chargiar il bigliet direct sin la carta cun quella ch'i vegn pajà. Er l'entrada tar tschertas attracziuns turisticas duaja vegnir pussaivla sin quella moda.
