Il suprastant Fabien Walder è sez possessur da chavals cun ina stalla a Flond. El veglia surtut agir sco mediatur tranter ils uffizis ed ils possessurs da chavals.
Plirs possessurs, ch'han lur chavals en pensiun a Sursaissa, sajan vegnids ils davos dis per lur animals ed hajan manà davent els. Quella reacziun haja fatg smirvegliar. I saja dentant ina reacziun ch'ins stoppia acceptar e ch'haja da far cun tema. Cun quai che las alps ed ils manaschis spezialisads sajan avisads sin chavals da la Bassa valia quai sco rom turistic e quai fetschia quitads.
Tge ch'ins possia e stoppia far immediat, saja da prender ils chavals la saira en saivs autas cun tschintg cordas u metter els en uigl.
Anc betg cler tge ch'è propi capità
L'emna passada eran en tut quatter chavals ruts or dal claus. In han ins lura chattà mort ed in blessà. Quai ha er il manaschi pertutgà confirmà.
Dapli n'han ils responsabels però betg vulì dir. En il vitg ha quai chaschunà speculaziuns, er schebain il luf pudess forsa esser la culpa. Tenor l'uffizi da chatscha na datti fin uss nagins indicis che las blessuras vid ils chavals derivan dal luf. Ins possia però er betg excluder ch'il luf saja stà en il conturn. Ils resultats da las provas da DNA, prendidas al lieu, èn da spetgar en ca. in mais.