Siglir tar il cuntegn

Header

audio
Barla e Cilgia Jacomet han in hobi communabel
Or da Actualitad dals 30.08.2021.
laschar ir. Durada: 05:31 minutas.
cuntegn

In hobi communabel La mamma taissa – la figlia cusa

A chasa a Segnas taissa Barla Jacomet las tailas che sia figlia Cilgia Jacomet da Mels cusa silsuenter tar differents accessoris. Ellas partan in hobi communabel e vendan ils products sut il num «Da Nus». I na saja perquai betg mo l'ovra d'ina dad ellas duas, mabain dad omaduas.

Il cuser accumpogni ella gia dapi giuvna, di Cilgia Jacomet. Ella è scolasta dal fatg ed instruescha tranter auter scola da lavur e zambregiar. Avunda da fils e taila n'ha ella dentant betg: En ses temp liber cusa ella tastgas, satgados, etuis ed anc bler auter. Quai fa ella ensemen cun sia mamma Barla Jacomet. Lezza taissa tut las tailas che la dunna da 40 onns basegna per ils accessoris.

En la scola da puras avev’jau emprendì da taisser. Quai ha adina plaschì a mai. Insacura pli tard hai jau gì il giavisch da puspè entschaiver ed uschia èsi vegnì mes hobi.
Autur: Barla Jacomet dunna pensiunada cun blers hobis

In product unic

Sut il num «Da Nus» vendan ellas ils products e quai cunzunt a clientella che giavischa insatge unic. La gronda part sajan persunas enconuschentas ni da quels che vesian las fotografias ch’ella metti sin la plattafurma instagram, di Cilgia Jacomet.

In hobi communabel

Lavurar ensemen fetschia plaschair ad omaduas, di Barla Jacomet. Era sch’ellas n'abiteschian betg ensemen, sajan ellas bler en contact. Mintgatant saja ella schizunt surstada, tge che sia figlia cusi ord la taila ch’ella taissi, di la dunna da 64 onns.

video
Barla Jacomet a chasa vid taisser
Or da RTR dals 23.08.2021.
laschar ir

RTR actualid 11:00

Artitgels legids il pli savens

Scrollar a sanestra Scrollar a dretga