Avant otg onn ha la planisaziun cumenzà, uss è il project realisà: Ils 7 da december 2018 avra il Center Stenna a Flem sias portas. L'entir cumplex è construì sin la punt che collia Flem Vitg cun Flem Casa d'Uaul. Sut la punt sa chatta in bajetg cun 1'200 parcadis. Davos il center vegnan construidas trais chasas cun abitaziuns da vacanzas administradas. Lezzas lavurs da construcziun duajan esser terminadas la primavaira 2019.
Las dimensiuns dal Center Stenna:
- 113 meters lunghezza
- 30 meters autezza
- Custs: 160 milliuns francs
I dovra ils gronds per far l'entschatta
Ils gronds locaturs en il center èn «Explorit» che represchenta la marca «Kindercity e Sciencity». La Arena Alva, il Coop e la Banca Chantunala Grischuna. Ils investiders principals èn Iso Senn da Son Gagl e la banca gronda Credit Suisse.
«Explorit» ha fittà 2'800 meters quadrats. Sin quels sa chattan quatter kinos pitschens, l'exposiziun «Wasserwelten», la «Schlumpf Uhr» ed autras exposiziuns.
Ina gronda part da l'exposiziun è deditgada al scrivent franzos Jules Verne. Là datti exponats sco il sutmarin dal capitani Nemo, la »Nautilus« u er il ballun ad aria chauda da signur Phileas Fogg.
RR actualitad 07:00
