Glion cupitga la societad Infra Mundaun SA. Votantas e votants han decis cun 522 cunter 412 vuschs encunter ina participaziun a l'infrastructura d'ennevar da las pendicularas. La Lumnezia aveva curt avant decis cun in cler «gea» da sa participar a la Infra Mundaun SA. Il resultat da la Lumnezia munta 385 encunter 237 vuschs.
Che Glion saja pli sceptic vers il project hai jau sminà – ma jau hai tuttina spetgà in gea.
Plirs motivs
Per il president communal da Glion Aurelio Casanova dettia plirs motivs pussaivels che Glion ha ditg na:
- La situaziun finanziala da Glion: La vischnanca na stettia betg fitg bain ed ins discurria da forsa stuair auzar il pe da taglia.
- Forsa hajan intgins votants gì tema d'investir memia bler en in sport d'enviern che n'ha betg l'avegnir ch'ins spetga.
- Forsa hajan ins gì il sentiment ch'il project saja memia pauc madirà e ch'i na saja betg cler per tge ch'ins avess duvrà ils daners.
In plan B na datti betg
Ina surpraisa è il resultat era per il president da vischnanca da Lumnezia Duri Blumenthal. In plan B na dettia dentant betg. La lavur entschaivia danovamain. Ina opziun saja tenor Blumenthal che las vischnancas che han acceptà il project cuntinueschian la lavur.
Nus avain adina quintà ch'i vegni critic a Glion. Dentant ch'i dettia in na, n'avessan nus betg spetgà.
Cuntinuar sin la via tschernida
I dettia chaussas impurtantas per l'infrastructura d'enviern e da stad ch'ins na possia betg laschar star airi. Quai di il president da la vischnanca da Sursaissa Mundaun Ernst Sax. Els veglian cuntinuar sin la via tschernida e guardar enavant cun las duas vischnancas che han ditg «gea» e las pendicularas da Sursaissa Mundaun.
Las trais vischnancas en la regiun collavurian gia en Surselva turissem ed els hajan lantschà ensemen in project en il traffic public, e quai duess pussibilitar da collavurar enavant.
Sursaissa aveva gia decidì
La vischnanca da Sursaissa aveva gia decidì da sustegnair la fundaziun da la societad Infra Mundaun SA. Quai ha la radunanza communala dals 15 da settember, nua che la proposta è vegnida acceptada cun il cler resultat da 136 encunter 0 vuschs.
Resultats en survista
| Sursaissa / Mundaun | 100% gea | 0% na |
| Lumnezia | 62% gea | 38% na |
| Glion | 44% gea | 56% na |
Societad avess realisà nova infrastructura d'ennevar
Ina part dal Masterplan Mundaun prevedeva, ch'ina nova societad avess realisà la nova infrastructura d'ennevar planisada da las pendicularas e las pendicularas avessan silsuenter stuì pajar tschains per duvrar quella infrastructura. Purtadras da quella nova societad fissan stadas las pendicularas sezzas e las trais vischnancas Glion, Lumnezia e Sursaissa. Quels quatter partenaris avessan stuì metter a disposiziun total 6,9 milliuns francs per la fundaziun da la societad e dar garanzias da total 15,6 milliuns francs.
Repartiziun custs per fundar la societad d'infrastructura
| partenari | participaziun capital d'aczias | cumpart capital d'aczias | participaziun garanzia | cumpart garanzia |
|---|---|---|---|---|
| Sursaissa Mundaun | 2'410'000 francs | 35% | 6'050'000 francs | 39% |
| Lumnezia | 2'410'000 francs | 35% | 6'050'000 francs | 39% |
| Glion | 1'380'000 francs | 20% | 3'460'000 francs | 22% |
| pendicularas | 690'000 francs | 10% | - | - |
RR novitads 12:00+
