Il glindesdi saira ha la vischnanca da Flem envidà ad ina radunanza communala per orientar la populaziun davart il project da cumpra da l'infrastructura da l'Arena Alva. La sala è stada plaina. Preschents èn tranter auter stads ils trais presidents da vischnanca da Flem, Laax e Falera e Reto Gurtner, il president dal cussegl administrativ da l’Arena Alva.
Las vischnancas da Flem, Laax e Falera vulan cumprar l'infrastructura per 50 milliuns francs – quai è vegnì communitgà a la conferenza da pressa ils 24 da settember.
Otg paginas lunga è la missiva davart la quala il suveran da Flem, Laax e Falera decida la fin d'october. Ad intginas persunas para quella missiva in zic curta areguard la grondezza dal project, sco er ch'i mussa be in simpel quint e paucs detagls. Plinavant sajan be ils avantatgs per las vischnancas e las pendicularas vegnì numnads – nagins dischavantatgs.
Il contract da fittanza tranter l'Arena Alva e la Finanz Infra na vegnia però betg publitgà. Quai na saja betg usità ch'ins publitgeschia quel, hai gì num a l'orientaziun.
In auter tema è tranter auter stà l'investiziun en l'infrastructura che saja necessaria ils proxims 10 onns e l'obligaziun finanziala da las vischnancas en quest connex. Sco il schef da finanzas dal project Adrian Wolf declera, hajan ins fatg in plan da finanzas per ils proxims 10 onns nua ch'i saja previs d'investir 130 milliuns francs sur la Finanz Infra. En quest plan sajan tranter auter resguardadas las investiziuns en l'ennavaziun u la gastronomia. Quellas investiziuns vegnian las pendicularas a far cun u senza ils daners da las vischnancas, ha Wolf agiuntà, damai che l'Arena Alva stettia finanzialmain fitg bain.
Memia pauc temp?
Er per discussiun ha procurà la dumonda daco ch'ins n'haja betg dapli temp per decider davart uschè in grond project. Sco il president communal da Flem, Christoph Schmidt ha ditg, na saja quai tenor els betg memia spert da pudair decider davart quest project.
Nus essan da l'opiniun ch'ins vegn da furmar in'opiniun en quest temp cun las infurmaziuns ch'èn avant maun.
Plinavant ha Reto Gurtner ditg ch'i giaja qua per in contract e betg per ina nova lescha. La dumonda saja pia simpla: «Vulain nus cumprar ed uschia segirar las pendicularas, gea u na??».
Reacziuns a la fin per gronda part positivas
Cura che la fulla da glieud ha lura bandunà la sala suenter la radunanza, eran las vuschs dals dumandads e las dumandadas per gronda part positivas. La saira d'infurmaziun para er d'avair sclerì intginas dumondas avertas u puncts da critica.
Jau sun stà sceptic. Jau sun stà da l'opiniun ch'igl n'è betg l'incumbensa da la vischnanca da surpigliar ina Finanz Infra. Ma uss cun la preschentaziun stoss jau dir, ils gronds quitads èn davent.
Votaziuns
Las votaziuns davart la cumpra da l’infrastructura da las pendicularas han lieu en tuttas trais vischnancas la fin d'october – en mintgina dentant in auter di.
- Falera: gievgia, ils 23 d'october (radunanza communala)
- Laax: venderdi, ils 24 d'october (radunanza communala)
- Flem: dumengia, ils 26 d'october (votaziun a l'urna)