Infrastructura Arena Alva - Acziunaris da l’Arena Alva beneventan la vendita planisada

• Bunamain 95 milliuns francs vulan las vischnancas da Flem, Laax e Falera prender en ils mauns per la cumpra, han quellas communitgà la mesemna ensemen cun l'Arena Alva.
• Var la mesadad da la summa da cumpra duain las trais vischnancas contribuir, il rest duai vegnir cun chapitel ester da la Finanz Infra SA.
• Per il schef da l'Arena Alva Reto Gurtner èsi impurtant che l'interpresa resta francada en e segirada per la regiun, sco el di.
• Ils acziunaris e las acziunarias da l'Arena Alva èn persvas che questa vendita fiss ina buna chaussa, han ins udì a la radunanza generala da l'Arena Alva la gievgia.

L'Arena Alva e las vischnancas da Flem, Laax e Falera èn sa cunvegnidas davart il pretsch da cumpra per l'infrastructura da las pendicularas. Las trais vischnancas duain surpigliar l'infrastructura sin il culm per 94,5 milliuns francs. 50 milliuns francs duain vegnir repartids sin las vischnancas, passa 40 milliuns duain vegnir en furma da chapital ester da la Finanz Infra SA, quai han ils responsabels infurmà en ina conferenza da medias. L'ultim pled en chaussa ha però il pievel, quai en bun in mais. Cun la cumpra da l'infrastructura vulan las vischnancas da Flem, Laax e Falera evitar che las pendicularas vegnan vendidas ad investiders da l'exteriur.

Tgi paja tge?

La cumpra da l'entira infrastructura turistica sin la muntogna che la Finanz Infra SA surpigliass da l'Arena Alva e da la Cassons SA custa 94,5 milliuns francs. Las trais vischnancas duain sa participar cun en tut 50 milliuns francs, ils 42,5 milliuns francs vegnan ord chapital ester da la Finanz Infra SA. A questa societad tutgan uss gia ils indrizs da far naiv en il territori da skis.

*La vischnanca da Flem ha gia pajà anticipadamain 18 milliuns (FlemXpress) e sto perquai sa participar cun pli pauc che las autras vischnancas.

Contract tranter las vischnancas e l'Arena Alva

La gestiun duai restar tar l'Arena Alva, cun in contract da fittanza a lunga vista (model «sell and lease back»). Sper il contract da cumpra per l'entira infrastructura turistica sin il culm reglescha il contract d'affitaziun tranter la Finanz Infra SA e l'Arena Alva (fittadra) il suandant:

• Il contract n'ha betg in termin da scadenza. Las partidas pon visar el sin il pli baud suenter 30 onns (2056) cun in termin da visada da trais onns.
• Las vischnancas s'obligheschan da surpigliar tut ils custs da la Finanz Infra SA. Uschia vegnia la Finanz Infra a pudair preschentar er en l'avegnir adina in resultat gulivà e far avunda amortisaziuns per finanziar investiziuns futuras.
• Las pendicularas (sco fittadra) èn responsablas per il manaschi ed il mantegniment da l'infrastructura turistica sin il culm sco er per tut ils custs che sa resultan en quest connex.
• Cun visar il contract d'affittaziun po la Finanz Infra SA decider sezza sch'ella vul renovar il contract, tschertgar in fittadin nov u vender l'infrastructura.

Reto Gurtner vul tegnair l'interpresa en la regiun

Per il president dal cussegl d'administraziun da l'interpresa Arena Alva fissi simpel da vender bler pli char sia ovra da la vita, sco el ha ditg envers RTR.

Ils ultims 60 onns sajan vegnids investids circa 600 milliuns francs. Ed uss è la valita da l'infrastructura tenor Reto Gurtner tranter 200 e 250 milliuns francs. Per el saja dentant impurtant da tegnair qua quai ch'el haja bajegià si durant quests onns. Quai haja el realisà cun planisar l'avegnir da l'interpresa, ed er en vista a la proposta da las vischnancas.

Per las vischnancas da Flem, Laax e Falera na vesa il president communal da Laax Franz Gschwend nagin ristg cun questa cumpra. I saja in'investiziun unica, e lura haja la societad d'aczias da star bun cun ses chapital. Las vischnancas na sajan suenter betg obligadas d'investir ulteriurs daners.

Quai che pertutga ils avantatgs per ils indigens ha Gschwend manegià envers RTR, che quels fissan strusch garantids en il mument che l'Arena Alva vegniss en mauns esters. Uss possia la populaziun era quintar en l'avegnir, da pudair nizzegiar il territori sut cundiziuns raschunaivlas.

Reacziuns d’acziunaris ed acziunarias

In di suenter l'infurmaziun a las medias èn 666 acziunarias ed acziunaris stads preschents a la radunanza generala sin il Crap Sogn Gion. L’interpresa Arena Alva ha preschentà ses rapport da l’onn passà, cun in ina svieuta da passa 123 milliuns francs. Dentant n'è betg il rapport stà en il center quest di, mabain la vendita da l’infrastructura da l’Arena Alva a las vischnancas Flem, Laax e Falera. Ils acziunaris e las acziunarias han ditg ch’ellas vesan questa cumpra sco insatge bun per la regiun. Las persunas dumandadas èn sa mussadas cuntentas che las pendicularas na van betg èn mauns esters.

E tenor las respostas na tema nagin per sias aczias sch'i vegniss tar la vendita.

Tgi che ha experientscha cun la vendita ad investiders da l’exteriur è il territori da skis Andermatt/Sedrun. Silvio Schmid era directur e maina uss divers projects en quest affar. L'onn 2022 ha la fatschenta americana Vail Resorts investì bunamain 150 milliuns francs en la destinaziun. Tenor el saja quai stada ina buna schliaziun per Andermatt/Sedrun da lez temp. Il potenzial da las vischnancas n'avess tenor el betg bastà da far in tal deal. Cun l'investider american hajan els fatg bunas experientschas. Silvio Schmid enclegia dentant era, che quai na fiss betg la varianta optimala per Flem, Laax e Falera.

Avantatgs per las vischnancas

En il messadi preschentan las vischnancas e l'Arena Alva ils avantatgs ch'ellas vesan per las duas partidas. Sco quai che las trais vischnancas da Flem, Laax e Falera scrivan, sajan ellas persvadidas d'avair chattà ina soluziun persistenta e locala per las pendicularas. En cumbinaziun cun la cumpra sin la muntogna possian las trais vischnancas garantir ulteriurs avantatgs per las vischnancas e lur populaziun:

• Malgrà che l'infrastructura tutga en l'avegnir a las vischnancas n'han ellas nagina responsabladad operativa per il manaschi da las pendicularas.
• Las vischnancas survegnan in mandat en il cussegl d'administraziun da la Arena Alva SA sco era da las Pendicularas Arena Alva SA ed ha en l'avegnir dretg da cundecider en dumondas strategicas da questas societads. In reglement d'organisaziun ch'è approvà communablamain reglescha la collavuraziun.
• Las pendicularas s'obligheschan da garantir durant circa 300 dis da manaschi ad onn ina purschida d'auta qualitad, confurma a la stagiun ed ils basegns turistics.
• Las garanzias finanzialas (Bürgschaft) che las vischnancas pajan oz a la Finanz Infra SA pon vegnir stizzadas (30 milliuns francs).
• Las reducziuns da prezis che las pendicularas dattan als indigens da las trais vischnancas pon vegnir garantidas a lunga vista.
• La soluziun rinforzia la collavuraziun cun il mastergn ed il commerzi local sco era cun la hotellaria e la parahotellaria. Entras quai possian vegnir segiradas las plazzas da lavur e la creaziun da valur da la regiun.

Avantatgs per las pendicularas

Entras la vendita e prender a fit fan las pendicularas quint cun suandants avantatgs:

• Custs da finanziaziun pli bass: l'auta bonitad da las vischnancas procura che la Finanz Infra SA po profitar da tschains pli bass sin emprests che quai che las pendicularas survegnessan. Quai chaschunia er tschains d'affittaziun pli bass.
• La cumpra da l'infrastructura saja ina soluziun persistenta e regiunala che garantescha la cuntinuitad da las pendicularas. Per il cussegl d'administraziun da la Arena Alva SA saja quai ina finamira impurtanta.
• Sco affitaders e gestiunaris possian las pendicularas sa concentrar sin sviluppar la purschida e mantegnair l'infrastrucutra.
• Las pendicularas (sco affitaders/gestiunaris) han vinavant il dretg d'in mandat en il cussegl d'administraziun da la Finanz Infra SA. Uschia pon dumondas strategicas er en l'avegnir vegnir purtadas communablamain.