Il Museum Regiunal Surselva va cun ses project a la tschertga da l'istorgia medicinala. Davart quest tema na dettia betg blera litteratura, la savida davart quest tema saja en il chaus da la populaziun indigena, di Ursina Jecklin, la manadra dal Museum Regiunal Surselva.
La savida davart l'istorgia medicinala è en ils chaus da la populaziun indigena.
Uschia vul il museum, ensemen cun la Protecziun da la cultura grischuna, animar glieud interessada da daventar «detectivs istorics». Questa glieud po suenter ch'ella è vegnida scolada, rimnar infurmaziuns tar enconuschents, parents ed en lur vitgs. Las infurmaziuns èn funtaunas istoricas sco recepts tradiziunals ch'èn vegnids fin ussa mo dats vinavant a bucca, u er testimonis da perditgas dal temps che san raquintar sco il provediment medicinal funcziunava pli baud en la regiun. Plinavant tschertga il museum utensils e cudeschs vegls ch'èn er perditga da la medischina d'antruras. Ils resultats da quella retschertga participativa vegnan publitgads sin la pagina d'internet dal museum. Forsa dettia er in cudesch, uschia Ursina Jecklin.
Per ch'il project «medischina el vitg» prendia chatsch, infurmescha il Museum Regiunal Surselva questa sonda da las 14:00 tut las persunas interessadas. Plinavant ha el gia publitgà in'annunzia sin sia pagina d'internet per recrutar las detectivas ed ils detectivs istorics.
