Siglir tar il cuntegn

Header

Carta geografica cun indicaziuns.
Legenda: Poi vertir 100 trieps da lufs en Svizra? La societad decida! (Carta geografica cun inditgà 100 trieps da lufs virtualmain e senza garanzia). RTR, Reto Pfister
cuntegn

La populaziun da lufs Quants lufs dovri en Svizra?

Ils ins vulan puspè bandischar il luf ord la Svizra, auters vesan ina populaziun ideala da plirs tschients animals. La finala vegn il futur ad esser insanua tranter quests dus pols, manegia in expert da lufs da l'Universitad da Vienna che RTR ha dumandà.

Il mument hai enturn 100 lufs en Svizra. Per ils ins memia blers, per ils auters bler memia paucs. La realitad vegn ad esser insanua entamez.

Uschè paucs sco pussaivel

Ils purs èn quels che pateschan il pli fitg dal return dal luf. Quel procura als pertutgads per lavur supplementara e bleras giadas per maletgs sgarschaivels. L’agricultura sa dosta cunter il return dal luf, e singuls giavischan ils animals enavos danunder ch’els èn vegnids.

audio
Quants lufs poi vertir?
05:12 min, Actualitad dals 30.03.2021.
laschar ir. Durada: 05:12 minutas.

Almain 800

Las organisaziuns per la protecziun da la natira e dals animals sustegnan la protecziun pli u main totala dal luf. L’uniun «Wolf Schweiz» pretenda che la Svizra haja plaz per almain 100 trieps da lufs. Quai fissan alura circa 800 lufs.

Il luf resta

Tenor il professer Klaus Hackländer, che maina l'Institut per biologia da selvaschina ed economia da chatscha a l'Universitad da Vienna, è il luf ina realitad che vegn strusch a svanir pli. Ils purs stoppian s’endisar vi da quels ed adattar lur manaschis.

Da laschar sa sviluppar ils lufs uschia sco il mument, numnadamain senza ina regulaziun, vesa Hackländer sco grond privel. Senza in management dal luf vegnia quel en curt temp a procurar per gronds problems.

Emprender da quels che han adina gì lufs

Tenor Hackländer na sto la Svizra betg inventar da nov la roda. En ils territoris, nua ch’ils lufs n'èn betg vegnids extirpads, possian ins guardar, co che la coexistenza funcziunia. Ils purs protegian lur animals cun tut ils meds pussaivels ed ils lufs hajan grond respect envers la glieud.

La Svizra sto tenor Hackländer emprender che betg mo ils purs han da purtar las consequenzas negativas dal return dal luf. La Frantscha per exempel impunda per mintga luf ina summa da circa 80’000 Euros. Per la Svizra muntass quai, ch’ella stuess investir passa 8 milliuns francs ad onn. Quai è dapli ch'il dubel da la summa che vegn impundida effectiv.

audio
Vias pussaivlas per ina convivenza cun il luf – in discurs
05:04 min, Actualitad dals 30.03.2021.
laschar ir. Durada: 05:04 minutas.

I dovra in consens

Per chattar ina soluziun stuessan tenor Klaus Hackländer tut ils involvids seser vid ina maisa. Il sascagnim e las reproschas in a l’auter na gidian nagut. Emoziuns sajan da remplazzar cun pragmatissem.

RTR actualitad 07:00

Artitgels legids il pli savens

Scrollar a sanestra Scrollar a dretga