Siglir tar il cuntegn

Header

Luf cun sia preda.
Legenda: Luf cun sia preda. MAD, KARL-HEINZ VOLKMAR
cuntegn

Lufs Fa il luf donn u è el da niz per la biodiversitad?

Cura ch'ins discurra sur dal luf, datti savens sulet alv u nair. Ina via tranteren, e pragmatissem – quai vesa sco soluziun il manader da l'Institut per biologia da selvaschina ed economia da chatscha a l'Universitad a Vienna, Klaus Hackländer.

Cura ch'i va per il luf, alura èn las opiniuns divididas. Aderents ed adversaris na taidlan betg in sin l’auter.

I dovra pragmatissem

Professer Klaus Hackländer maina l'Institut per biologia da selvaschina ed economia da chatscha a l'Universitad da Vienna. El è enconuschent en la scena che s’occupa cun il luf e di, ch’il luf porta a la glisch pli svelt problems ch’èn gia avant maun. Las pretensiuns ch’il luf saja simplamain bun u schlet per la biodiversitad na lascha el betg valair.

Guaud

Durant la campagna da votaziun per la revisiun da la lescha da chatscha federala era il selvicultur Martin Kreiliger s’exprimì cunter il project. Quai cun l’argumentaziun ch’ils lufs gidian da regiuvinar ils guauds a moda natirala. Perquai sajan ils lufs da proteger.

Klaus Hackländer di, che quai saja pussaivel, dentant possian ils lufs era avair in effect negativ per il guaud. Cun la preschientscha dals lufs furman cunzunt ils tschiervs pli gronds trieps, ed uschia po er il dumber da donns en il guaud s’augmentar. Il problem fundamental che la regiuvinaziun natirala dal guaud n’ha betg lieu – è tenor Hackländer – ch’igl ha memia blera selvaschina. In problem che n'ha da far nagut cun il luf.

Pastgiras d'alp

Da vart da l’agricultura vegn pretendì, ch’ils lufs sforzian da dar si bleras alps. L'engaschi da proteger las muntaneras cunter ils lufs saja memia grond, uschia che bleras alps na vegnian en l'avegnir betg pli chargiadas. Era quai in problem che ha tenor Klaus Hackländer da far pli bler cun la midada da structura da l’agricultura che cun ils lufs. Lezs portian sulet a la glisch pli spert il problem.

Tar las pastgiras d’alp vesa Hackländer dentant il problem, che duas chaussas protegidas fruntan ina sin l’autra. D’ina vart la biodiversitad ch’è vegnida furmada da l’agricultura durant ils davos tschientaners – e da l’autra vart ils lufs che turnan, suenter ch’els èn stads extirpads. Qua stoppia la societad decider, tge che valia pli bler per ella.

RTR actualitad 07:00

Artitgels legids il pli savens

Scrollar a sanestra Scrollar a dretga