L’emprima runda da contractivas per l’acquist da terren è terminada, uss possian els ir en la segunda e speranza terminar quella la stad, ha ditg il president communal Patrick Schaniel:
Cun il project sin maisa pon ins concretisar la revisiun da la planisaziun dal territori e numnar las zonas concret sco zonas da camping e da recreaziun. Alura vegnan ins a formular la dumonda da construcziun. Quai basegna dentant temp ed era perseveranza, ma quella hajan els per quest project che saja er in project da pliras generaziuns.
Vischnanca ha il timun
Dapi radund in onn ha la vischnanca da Sumvitg surpiglià il timun per il project «Lag Salischinas», quai surtut era per vegnir da recaltgar ils daners necessaris per il project. Quai vegnia segir ad esser ina sfida ed er il maun public vegnia ad esser dumandà da sustegnair finanzialmain il project, uschia il president communal. Ma la cumissiun incaricada ha uss temp dad ir a la tschertga dals daners necessaris e da prender a maun las ulteriuras sfidas. Per exempel la dischlocaziun da la lingia d’auta tensiun che maina il mument tras l’entir project, di il president da la cumissiun, Placi Wenzin.
Tras Selvas e Pardialas
Il project victur tschernì «Tras Selvas e Pardialas» curt avant Nadal dals responsabels vegn realisà dal biro d’architectura Capaul e Blumenthal da Glion. Cun la tscherna hajan ins uss fatg in pass decisiv per l'entir project Lai Salischinas che furmia la basa per las proximas lavurs en connex cun la planisaziun dal territori ed il model da fatschenta, uschia vegn Andreas Bärsch dal biro accumpignant «Quant» cità en la communicaziun da la vischnanca.
L'idea per in lai a Salischinas è naschida il 1997 e dapi radund 10 onns vegn concretisà il project cun far examinaziuns preliminaras e concepts per realisar in lai cun zonas da sport e recreaziun. Il project actual è previs sin ina surfatscha da dapli che 13 hectaras cun purschidas da camping e glamping e cun gastronomia. Er la vischnanca da Sumvitg è cuntenta ch’il project survegn dapli conturas. Per Patrick Schaniel è quai in pass impurtant per il project Salischinas sco er per il svilup da l’entira vischnanca da Sumvitg.
