Ils 16 da november 2002 è in di che resta a blers da Rueun en memoria. Ferma plievgia aveva chaschunà pliras bovas en la Surselva. Igl aveva pluvì da la gievgia enfin la sonda – en tut bun 400 liters per meter quadrat. En tschintg vischnancas da la Surselva avevi dà fitg grevs donns. Bovas avevi dà a Trun, Schlans, Pigniu, Tersnaus ed a Rueun. Tranter auter eran duas punts vegnidas devastadas ed ils trajects da la Viafier Retica eran vegnì inundads. Morts n'avevi per cletg betg dà.
Las bovas da la ual da Valdun
A Rueun eran gist duas bovas vegnidas giuadora quest di. L'emprima da mezdi e la segunda enturn las 4 il suentermezdi. Tschertas chasas avevan stuì vegnir evacuadas – en tut eran 70 persunas pertutgadas. Il quartier da s. Clau era vegnì curclà da la bova. Oz è Rueun protegì cun rempars da 300 meters lunghezza e bun 10 meters autezza. Ils rempars èn marcants per il maletg da Rueun e regordan anc oz vid la catastrofa da natira.
3 anghels pertgiraders
Suenter che l'emprima bova era vegnida avevan ins entschet a rumir cun excavaturs per ch'ì na dettia betg inundaziuns. Lura è dentant ina segunda bova pli gronda e pli ferma vegnida. Per trais dals maschinist era l'alarm vegnì memia tard e la bova aveva serrà els en lur maschinas. In dad els era Paulo Marques Rodrigues che nus avain visità avant 3 onns:
