«Las vischnancas decidan e betg las uniuns per l'ambient»

Quai è il facit da Linus Livers, noss correspundent en Surselva. El è s'occupà da rudent cun quest tema.

purtret Linus Livers Bild in Lightbox öffnen.

Legenda da maletgs: Linus Livers Correspundent Surselva RTR

  • Sch'ina vischnanca vul pudair laschar pascular vinavant animals da niz en la zona da coc, lura è il WWF encunter.
  • Ir per cristals: Vrin/Lumnezia di gea - il WWF na.
  • La chatscha sin capricorns: Vrin/Lumnezia vul laschar quai uschia sco igl è reglà fin ussa - il WWF vul scumandar quella chatscha en la zona da coc.

Questa glista da «gea» e «na» pudess'ins prolungar ad infinit.

La Pro Natura Grischun va in zic in'autra via, e fa valair ch'en la zona circumdanta dettia era restricziuns. Quai è fin ussa adina vegnì snegà dals organisaturs dal Parc Adula. En questa zona sa chattan tut ils vitgs dal Parc Adula. En cas d'in gea al Parc Adula valan pia las finamiras da l’ordinaziun davart ils parcs d’impurtanza naziunala er per la zona circumdanta. Quai di la pro Natura.

Martin Hilfiger, il directur dal parc Adula ha respundì sco suonda sin quella pretensiun da la Pro Natura: «Betg las spetgas da las uniuns per l'ambient èn la mesira cun la quala nus vegnin a far il parc. Las 17 vischnancas e l'uniun che maina il parc han decidì e decidan communablamain tge che vala.»

Tenor mai la suletta dretga resposta envers uniuns per l'ambient. Las vischnancas fan il parc e betg las uniuns per l'ambient. Il sa maschadar en da quellas uniuns è cuntraproductiv per il parc. La tema che la populaziun cumpria il giat en il satg crescha, e quella tema producescha opposiziun ed in cler na encunter il parc.