I plova, la tschajera è fitg spessa ed igl è fraid. La gruppa da voluntaris da l'Emmental na para dentant betg da laschar disturbar da questas cundiziuns malempernaivlas. Ils umens lavuran tuttina cun bler schlantsch e motivaziun.
Jau vom gugent en la muntogna e sch'ins fa lura anc insatge dal bun, lura è quai avunda motivaziun per mai.
Els n'hajan pers insumma nagut da lur plaschair e motivaziun, conferma Andreas Saurer, il president da la «Rolling Church». Era betg suenter 24 onns lavur cumina en la Surselva.
Gia per la terza giada sin l'Alp da Siat
La gruppa sa cumpona da 20 umens da differentas vegliadetgnas – da giuvenils fin pensiunads. In u l'auter ha schizunt stuì prender in'emna vacanzas per pudair s'engaschar sin l'alp da Siat. Els construeschan funtaunas, punts, saivs, vias e taglian chaglias.
-
Bild 1 von 5. Dus lavurers voluntaris ch'èn gia dapi passa 20 onns da la partida. Bildquelle: RTR.
-
Bild 2 von 5. In piogn en construcziun. Bildquelle: RTR.
-
Bild 3 von 5. Il piogn suenter che las lavurs èn terminadas. Bildquelle: RTR.
-
Bild 4 von 5. Ina via vegn meglierada. Bildquelle: RTR.
-
Bild 5 von 5. Qua datti ina saiv cun ina porta, uschia ch'igl è pli simpel da stgargiar il muvel en l'avegnir. Bildquelle: RTR.
Gia per la terza giada èn els sin l'Alp da Siat. Lavur hai pia pli che avunda. Quai sa era Elias Casanova, il president da la corporaziun d'Alp da Siat, ch'appreziescha fitg la lavur che vegn prestada.
Els fan lavurs che nus na pudessan mai far. Nus essan uschè paucs purs qua e vegnin be da dar dumogn a las chaussas las pli urgentas. Senza lur sustegn vegniss quai adina mender.
Ins senta che tuts han blera experientscha ed èn experts en lur mastergns. In sustegn ch'ils purs da l'alp da Siat stiman fitg e che è tenor il president da la corporaziun d'alp era necessaris per insumma dumagnar tut las lavurs.
Ina buna collavuraziun è decisiva
Material e maschinas metta la vischnanca da Glion a disposiziun. Per ch'ils voluntaris possian far lur lavur a moda effizienta saja la finala la collavuraziun tranter tut ils involvids decisiva, analisescha Andreas Saurer.
Cumenzà ha tut a Rueun
Pertge prestan ils Bernais insumma lavur cumina en Surselva e betg insanua auter? Cumenzà haja tut a Rueun, sa regorda Andreas Saurer. El haja avant manà in champ da giuvenils a Rueun. Cura ch'el haja udì l'onn 2002 da questa bova da glitta, haja el dumandà la vischnanca sch'els dovrian agid.
Uschia èsi sa dà che nus avain lura lavurà là l'emprima giada. Suenter han els dumandà sche nus possian era metter en urden lur alp.
Dapi lura ha la gruppa dad Andreas Saurer prestà mintg'onn in'emna lavur cumina sin in'alp en Surselva. Sch'ins adescha tut quellas uras dals ultims 24 onns, alura correspundan quellas a la lavur d'in emploià cumplain durant sis onns.
L'auter onn s'engaschan ils umens dal Emmental sin l'Alp da Rueun. A Rueun, nua che l'istorgia da la «Rolling Church» en Surselva ha cumenzà avant bunamain in quart tschientaner.