Viver cun ils lufs. Cun il dumber da trieps che crescha en Grischun vegn il tema adina pli preschent. En la rolla da mediaturs tranter lufs ed umans emprovan ils guardiaselvaschina da chattar in equiliber tranter agir e laschar star.
In dals trieps da lufs en Grischun è naschì avant trais onns sisum la Surselva, tranter Mustér e Curaglia. Il triep da Stagias. Igl è era l’emprim triep en Svizra nua ch’igl è reussì da montar al mastgel in cularin da GPS. Grazia a las datas che vegnan en mintga di, han ils guardiaselvaschina emprendì ina massa davart il cumportament ed usits d’in triep da lufs.
Sch’els van a chatscha, fan els chatscha. Sch’els n'han betg en il senn da far chatscha, van els tut tenor mo paucs meters sper ils animals vi senza far stim dad ir vi e mazzar els.
In’autra enconuschientscha dals guardiaselvaschina è ch’il triep turna adina puspè enavos tar il stgarp, fin che quel è nizzegià.