Ils 4 da mars 2026 ha preschentà la Infra Mundaun AG (IMAG) il svilup per l’avegnir turistic da la destinaziun Sursaissa Mundaun e Lumnezia. Cun in volumen d’investiziun da 24,75 milliuns francs duain las infrastructuras d’enviern e da stad vegnir sviluppadas e la regiun vegnir rinforzada sco destinaziun attractiva durant l’entir onn. Il project è in’ovra communabla da las vischnancas Lumnezia e Sursaissa Mundaun sco era da las pendicularas Sursaissa Mundaun. La preschentaziun è stada a Vella ed il plan ha num «Enturn il Mundaun».
Quatter pilasters per in avegnir ferm
Il masterplan sa basa sin quatter direcziuns strategicas:
- Ennavaziun: Cun supplementarmain 22 kilometers da pistas artifizialmain ennavadas e novs lais da retenziun duai la segirezza da naiv vegnir augmentada e la stagiun d’enviern pli planisabla.
- Senda tematica: Ina nova senda tematica tranter il Piz Mundaun e Stein duai attrair famiglias. Cun elements interactivs vegn promovida l’identitad regiunala cun elements rumantschs e gualsers.
- Tur da raiver Triel: In tur da raiver cun divers elements da gieu ed ina plattafurma da panorama duai crear in highlight per il program da stad sin vart da la Lumnezia.
- Offertas da bike: Trails e parcs da bike duain rinforzar l’offerta da stad e porscher novas pussaivladads per giasts.
Finanziaziun e proxims pass
La finanziaziun dal project vegn garantida cun agid da chapital agen e chapital ester. Las vischnancas Lumnezia e Sursaissa Mundaun sco era las pendicularas sa participeschan a las investiziuns e porschan garanzias per credits. La gronda part da l'emprima investiziun è per l'ennavaziun – quella part custa 20 milliuns francs.
Per las vischnancas munta il project investiziuns da 3,9 milliuns francs chapital agen e garanzias da 7,5 milliuns per finanziaziuns entras bancas. Las pendicularas investeschan 1,95 milliuns francs chapital agen.
Las radunanzas communalas vegnan a decider ils 16 d'avrigl 2026 davart ils credits. En la Lumnezia è previs in'ulteriura votaziun a l'urna ils 14 da zercladur.