L'uniun Nordic Surselva è responsabla per la preparaziun da la loipa da passlung tranter Trun e Mustér. La mancanza da naiv natirala il december ha sfurzà da preparar intginas loipas cun naiv artifiziala. Per lezza han dentant ditg las temperaturas bassas mancà. Cur che quellas en stadas qua, han ils responsabels realisà mintgamai a Trun e Mustér ina runda da bun 1 kilometer ed ils davos dis la loipa tranter Trun e Surrein cun ina lunghezza da 4 kilometers.
-
Bild 1 von 4. L'entschatta da la producziun da naiv. Bildquelle: Nordic Surselva.
-
Bild 2 von 4. ...ils muns s'emplainan... Bildquelle: Nordic Surselva.
-
Bild 3 von 4. ... e ston vegnir repartids... Bildquelle: Nordic Surselva.
-
Bild 4 von 4. La loipa vegn preparada. Bildquelle: Nordic Surselva.
L'uniun Nordic Surselva
L’uniun Nordic Surselva vegn purtada da las vischnancas da Mustér, Sumvitg e Trun. Mintga vischnanca ha dus delegads e quels organiseschan la preparaziun da las loipas. Da nov datti in co-presidi en l’uniun cun l'anteriur passlungist Eligius Tambornino e ses frar Linard. Els han surpiglia l'uffizi da Flurin Maissen ch'aveva presidià l’uniun ils davos passa dus decennis.
La gronda sfida è stada che nus avevan la naiv artifiziala e ch'ils prads n'eran anc betg schelads. Uschia vain nus a l'entschatta betg pudì reparter la naiv.
Per la preparaziun da las loipas dovran ils organisaturs il sustegn da la cuminanza da maschinas da las trais vischnancas. Lezza organisescha ensemen cun intgins purs la repartiziun da la naiv sin ils tschancuns previs. Ils custs da la preparaziun da las loipas vegnan cuvrids cun entradas or da la vendita dals pass da passlung ed entras las vischnancas purtadras.