Argovia, Berna, Sviz, Son Gagl, Lucerna, Tessin ... Qua e là in Grischun e blers Turitgais. Tranteren eran intgins Tudestgs ed Austriacs. Manegià èn ils numers dals autos sin ils parcadis da las pendicularas da Savognin. I regna in viv ir e vegnir, in mezdi tranter Nadal e Bumaun.
In giast da Turitg raquinta ch'i saja stà grondius l'avantmezdi sin pista «Nus eran qua a las 08:30 ed eran ussa fin a las 12:30 sin ils skis.» Uss sajan dentant schon tants ids giu da pista che la naiv na saja betg pli bella per ir. Perquai cedian els uss.
Ed era la blera glieud para d'esser per intginas il motiv per pachetar a mezdi ils skis sin l'auto u prender il bus da sport vers chasa. Ina dunna che abita a Savognin raquinta «Igl era fitg bel, fin che la glieud è vegnida. Nus eran baud qua, ma ussa èsi daventà memia privlus. Ussa giain nus anc in pau a spass. Quai è era bel.»
E las pistas sajan preparadas fitg bain, perquai ch'igl haja nagina naiv. In auter giast da la Bassa manegia «I fiss bel. Igl ha simplamain memia blera glieud, vul dir memia paucas pistas èn avertas. Quai è propi il problem. Perquai ston tuttas e tuts ir sin ils medems lieus. Ma las relaziuns da pista èn top.»
In'autra dunna da Turitg di ch'ella chattia che las pendicularas fetschian simplamain il meglier pussaivel cun la pauca naiv. «A mai para ch'i fetschian in super job. Quai sto ins era anc dir.»
Chalzers da skis claccan sin il catram, aissas e skis vegnan tratgs or da las valischeras. Ed uffants e creschids monteschan chapellinas per ir sin pista.
Entant che intgins van, vegnan ils parcadis libers gist puspè occupads, da quels e quellas che han duvrà in pau pli bler temp per vegnir or da la brenta.
«Nus avain anc stuì pachetar oz en damaun per vegnir qua en vacanzas ils proxims tschintg dis ed avain duvrà temp per pachetar tut ensemen: skis, aissas, scarsola ...» raquinta Natalia Plaz oriunda da Savognin che stat uss dentant cun ses um ed ils trais uffants en il Signuradi. La blera glieud sin pista la disturba betg.
Quai è absolut tuttina. Nus avain ussa gì il segund di tschajera giu là, perquai partin nus gugent cun tuts e tuttas uschè ditg che nus pudain er avair in pau sulegl.
Saja quai la damaun baud sin las pistas frestgas u il suentermezdi en la cunfola. In di en la naiv tutga per blers giasts ed era indigenas vitiers quests dis. Era sch'igl è da mussar in pau pazienza e prender resguard l'in sin l'autra.