Fadri Arpagaus che maina il Berghuus Radons ed è era schef da cuschina ha enturn 40 collavuraturs e collavuraturas. Per vegnir a questas persunas na saja betg stà grev, el haja perfin gì uschè bleras annunzias sco anc mai. Era sche quai sajan stadas bleras persunas na sajan betg tuttas stadas bunas. Fadri Arpagaus ha tar singuls aspirants da l’Italia badà che quests èn sa decidids cunter la plazza pervi da la nova taxa che l’Italia pretenda. Questa taxa han da pajar persunas talianas che lavuran en Svizra – sper la taxa a la funtauna che vegn tratga giu da la paja. Uschia ch'i na renda betg da suttascriver in contract da lavur en Svizra.
Per il cumenzament da la stagiun ha il Berghuus Radons anc memia bler persunal perquai che la naiv manca ed uschia era ils giasts.
Sche la naiv vegn ed igl è bell'aura avain 400 fin 500 gentars per di. Senza naiv avain 40 enfin 50 gentars.
Ord quest motiv ha il manader da l’affar stuì dar giu la plazza ad intgins gidanters. Ils auters contracts da lavur tegna el dentant, cun quai ch’el è optimistic che la naiv vegn.
A l’Engiadin’Ota mancan las persunas da Chiavenna
La medema sfida sco a Savognin ha era l’Engiadin’Ota cun las taxas che l’Italia pretenda dals cunfinaris e las cunfinarias – dentant en ina pli gronda dimensiun cun quai che bler persunal vegn si da Chiavenna. Nicole Reichelt ha fatg circa 80 contracts da lavur per ils divers restaurants a Marguns, il territori da skis sur Schlarigna.
La fortuna saja che blers collavuraturs vegnan gia dapi plirs onns a lavurar en l’Engiadin’Ota ed èn pervi da quai protegids da questas taxas da l’Italia enfin il 2033. Dentant sajan questas taxas ina sfida. E sche las persunas sa decidan da suttascriver in contract da lavur vegn anc ina segunda sfida, numnadamain da chattar ina abitaziun per persunal en la regiun.
La Motta a Scuol ha persunal stabel
Tenor Robert Amstutz che maina La Motta a Scuol na saja la tschertga da persunal betg vegnida pli simpla. Dentant saja el en ina situaziun buna cun persunal stabel che returnia adina puspè.
Blers lavuran era la stad en la regiun, per exempel sin il bajetg u en il service e lavuran d’enviern lura en il restaurant da muntogna.
Il davos mument è il restaurant Burleun pront
Curt avant che la stagiun cumenza ha Nadine Brügger, che maina il restaurant Burleun a Breil, cumplet ses team da 25 persunas.
Proxim’emna avessan anc da vegnir dus che remplazzan duas autras persunas che n’èn betg vegnidas – in n'è betg cumparì è l’auter è crudà or causa motivs da sanadad. Sche quests dus vegnan, essan nus cumplet.
La mesadad dal team en il restaurant Burleun sajan persunas che lavuran adina puspè tar els. L’autra mesadad èn persunas novas e tar questas ha Nadine Brügger badà che lavurar mo da Nadal fin Pasca saja memia curt e betg pli attractiv per tuts. Dentant dovran els la glieud che lavura en cuschina ed en il service. Il restaurant Burleun n'haja anc betg bleras reservaziun, forsa era pervi da la pauca naiv a Breil e tuttina èn els vegnids inundads da persunas ch'èn arrivadas spontan.
Tenor ils restaurants da muntogna dumandads han tuts avunda persunal per il cumenzament da la stagiun. Dentant manchia en intgins lieus anc la naiv e questa decida davart la massa da glieud che vegn a visitar ils restaurants.